8.6.20

DÍA MUNDIAL DOS OCÉANOS

Celebramos este día cunha recomendación: Plasticus maritimus, guía creada e publicada en portugués a partir do traballo da bióloga Ana Pêgo, con ilustracións de Bernardo P.Carvalho e texto de Isabel Minhós Martins, que vén de publicar Kalandraka traducido ao galego por Celia Recarey.

Trátase dun proxecto de uso sensato dos plásticos, que xa tivo moi boa acollida en Portugal no ano 2018, cando se editou alá por primeira vez, non só entre as crianzas, o público preferente ao que vai dirixido. A obra deu a posibilidade de facer chegar información sobre este tema, motivando as persoas a faceren mudanzas individuais e a crer na utilidade destes pequenos actos que, segundo reivindica a bióloga, teñen tamén o potencial de contaxiar máis alá das propias mans a familia e amizades.

O libro inclúe unha guía práctica para recoller plásticos na praia, desde botellas e bolsas a outros obxectos máis estraños, como lancetas de pesca ou puntas de parasol. Estas son mostras do que deu en chamar "plasticus maritimus, unha especie que presenta todas as características dunha invasora", explica, deixando abrollar a súa formación de bióloga mariña.




6.6.20

DÍA MUNDIAL DO MEDIO AMBIENTE

Para celebralo, sumámonos á campaña de SOGAMA contra o uso de plásticos e súa substitución por materiais de máis fácil reciclado e menos prexudiciais para o noso planeta.





29.5.20

PREMIOS YOUTUBEIR@S 2020

Os Premios Youtubeir@os, organizados polos servizos de normalización lingüística de dez concellos, das tres universidades e da Deputación da Coruña, abren este mércores o prazo de inscrición para a súa cuarta edición que inclúe cambios significativos nas súas bases e un incremento da dotación económica dos galardóns, que pasa dos 6.500 euros de 2019 a 7.500 euros para repartir nas doce categorías.

Estes galardóns buscan animar á creación de vídeos con temáticas e formatos diversos, desde vídeos de deportes, viaxes ou videoxogos ata vídeoblogs políticos ou vídeoconsellos de moda. Ao mesmo tempo, perseguen dar visibilidade tanto á produción en galego como á comunidade creadora e 'Expandir a Rede', como versa o lema deste ano.

O concurso está aberto a todas as persoas maiores de 14 anos con canles e/ou vídeos en galego, autoproducidos, subidos a Youtube e que estean publicados con data posterior ao 27 de setembro de 2019. No caso de presentar unha canle, esta debe conter polo menos cinco vídeos, en galego e realizados con posterioridade á mesma data.




PREMIO NORTEAR

Sexta convocatoria deste premio que derruba fronteiras convocando á mocidade escritora de Galiza e Portugal. Aberto o prazo ata o 30 de xuño.


28.5.20

LIBROS GALEGOS NA LISTA DE HONRA 2019 da OEPLI

A Organización Española para o Libro Infantil e Xuvenil (OEPLI) acaba de facer público o seu catálogo 2019. Esta selección dos 200 mellores títulos destinados a estes públicos editados ao longo do pasado ano recolle unha importante selección de obras galegas. Segundo apunta a Asociación Galega do Libro Infantil e Xuvenil, estas "son obras que obedecen a criterios de calidade e idoneidade, o que as fai merecedoras de formar parte desta lista de honra por seren consideradas significativas dentro da gran produción existente". O blog Rede Lectura lista un total de 21 obras seleccionadas na nosa lingua, ás que se suman outras nove que, aínda que escolleitas para o catálogo noutros idiomas están tamén dispoñibles en galego.


0-6 anos
O país do gran furado. Xerardo Quintiá . Baía Edicións
O veleiro verde. María Fumaça. Editorial Galaxia
Ola! Son un bicho bóla! Elvira Ribeiro. Apiario
Ratos de viaxe. Oli. Kalandraka

A partir de 6 anos
A que cheiran as cores?A esperada guía para coñecer o cerebro. Juan Casto Rivadulla. Editorial Galaxia
Os nosos bosques. Diego García et alii. Miudiño S. Coop. Galega
A pequena compaña. Carlos Labraña. Edicións Embora
Bicos e non balas. Antonio García Teijeiro. Editorial Galaxia

A partir de 9 anos
Lúa en ningures . Beatriz Maceda Abeleira. Xerais
Noé e gato fan teatro. Gloria Sánchez. Oqueleo
Pioneiras 2.Galegas que abriron camiño. Anaír Rodríguez. Xerais
Somos os monstros. Paula Carballeira. Xerais

A partir de 12 anos
Conta nove estrelas .Andrea Maceiras. Xerais
Xelís, o guieiro das botellas do mar. Rosa Aneiros. Xerais

Xuvenil
Be water. Antía Yáñez. Cuarto de inverno
Memoria do silencio. Eva Mejuto. Xerais
O grupo. An Alfaya. Xerais
O home que mercou un libro. Paco Martín. Editorial Galaxia
Os corpos invisibles. Emma Pedreira. Xerais
Parece unha formiga. Pablo Otero. Kalandraka
Penumbra. Daniel Landesa. Xerais

Tamén hai libros que se poden ler no orixinal ou na tradución ao galego, aínda que fosen seleccionados noutra lingua:

0-6 anos
Distinta. Beto Valencia. Kalandraka
O pirata valente. Ricardo Alcántara. Kalandraka
Animais. Antonio Rubio. Kalandraka

A partir de 6 anos
Bechopoemas e outras bestas. Leire Bilbao. Kalandraka
O home que contaba estrelas . Arturo Abad. OQO
Versos e viceversos . Antonio García Teijeiro e Juan Carlos Martín Ramos. Kalandraka

Xuvenil
Iridium . Francisco Castro. Editorial Galaxia
MedoCare Santos. Edebé

27.5.20

QUE QUERO SER DE MAIOR?

Nova guía en galego publicada polo Parque Tecnolóxico de Galicia para animar ás rapazas a cursar estudos vinculados ás ciencias e á tecnoloxía.

https://www.tecnopole.es/sites/default/files/pdf/QUE%20QUERO%20SER%20DE%20MAIOR.pdf


22.5.20

AI HO! GALEGO!


Carlos R. Calvente, membro do proxecto Convivencia de Educación Inantil Cholo e Nela,  acaba de presentar o seu último vídeoclip elaborado para amenizar esta fase 1 do descenso do confinamento para a rapazada galega titulado Ai ho! Galego!  co que tamén queren celebrar o Día das nosas Letras e “promover o agarimo e o valor da nosa lingua”.

INSTA EN GALEGO


A Iniciativa Instagram en galego, coñecida por Insta en galego e promovida polo activista dixital Carlos Vieito, naceu en 2018 co obxectivo firme de contribuír a galeguizar a rede social Instagram, comezando pola súa tradución ao galego e, tamén, promovendo o uso da lingua entre os seus usuarios e usuarias. Co devandito no punto de mira, lanzáronse campañas e lemas animando á xente a demandar que Instagram estea en galego.

Nestes tempos de pandemia é unha das principais fontes de actividade online contribuíndo á cultura e ao lecer con directos diarios a través da dita rede social, tirando partido dela para promover a cultura e o uso da lingua galega. Son directos “con risas e conversas amenas con persoas que nos contan como pasan o seu confinamento”, sinala Vieito, lembrando que entre as persoas que pasan polo programa atópanse Gonzo, Sabela Ramil, Sés, Touriñán, Vero Boquete, Blondie Muser, etc.

Co gallo das Letras Galegas a iniciativa preparou unha maratón de directos dende ás 10 da maña até ás 10 da noite con entrevistas a todo tipo de persoeiros e institucións que promoven a lingua no seu día a día. Na grella da maratón participaron A Mesa ou AGAL; artistas como Xabier Diaz e Carlos Blanco; traballadores/as da lingua como Nel Vidal, Carlos Callón e Pilar Ponte, ou empresas que promoven a lingua como Rei Zentolo ou a Escola Semente, entre outras.





19.5.20

EU SON A TÚA LINGUA. TI ES A MIÑA FALA

Fermosa iniciativa de profesionais do deseño internacional polo Día das Letras Galegas.

Podes falarme como queiras. Con asento, con gheada, con seseo… O importante é falarme. Como fixeron estas creadoras e creadores de arredor do mundo. Moitos era a primeira vez que me falaban. Espero que a súa ousadía che sirva de inspiración para falarme.

Estas son algunhas das creacións. Podes seguilos en istagram @falame.gal





REMATA O PRAZO DO ENREGUÉIFATE





17.5.20

ORGULLOSAS E ORGULLOSOS DA NOSA FALA

Cantamos os fermosos versos de Manuel María con Uxía, Tanxugueiras e Faia.

QUEDA NA CASA

ESPECIAL REINTEGRACIONISMO 3

FELIZ DÍA DAS LETRAS GALEGAS

Celebrámolo  cantando en galego e portugués , derrubando fronteiras e situando a nosa lingua no camiño do futuro que desexou para ela RICARDO CARVALHO CALERO.

16.5.20

CARBALLO CALERO NA VOZ DE UXÍA

ESPECIAL REINTEGRACIONISMO 2

A CURUXA DE PAPEL

Saudamos esta nova iniciativa de Xiana e Celtia Sar, creadoras duna nova canle de audiolibros en galego. Vén de estrearse co conto "O inglés" de Retrincos de Castelao e publicaron xa un par de capítulos de Vento ferido de Casares, outro par de Arredor de si, de Otero Pedrayo mais o poema de Rosalía "Miña casiña, meu lar", tirado de Follas Novas. Podédelas seguir en Istagram @acuruxadepapel para estardes ao tanto das novidades.

Aquí tendes a súa última achega. De novo Retrincos, esta vez "O inglés".

SOLPOR. UNHA EXPOSICIÓN VIRTUAL

PARA SABER UN POUQUIÑO MÁIS DE CARVALHO CALERO

10.5.20

8.5.20

LECCIÓN 4 de PORTUGUÉS

ALINE FRANÇAO PON VOZ E MÚSICA A CARBALLO CALERO

O poema é de Carvalho Calero, escrito en ortografía reintegracionista, e a música de A minha embala, um projecto de Aline Frazão (voz, guitarra) e César Herranz (flauta transversal, percursão), ao encontro das expressões musicais dos diferentes países de língua portuguesa: Angola, Cabo Verde, Brasil, Portugal e Galiza, cantando em galego-português, crioulo, kimbundu e umbundu. Non pode haber mellor xeito de derrubar fronteiras.


7.5.20

6.5.20

5.5.20

DÍA MUNDIAL DA LINGUA PORTUGUESA. LECCIÓN 1



Hoxe celébrase o Día Mundial da Lingua Portuguesa. Sentímonos felices da facilidade que temos os galegos e galegas para comunicarnos cos falantes desta lingua, millóns de persoas dispersas polo mundo enteiro. Para celebrar este día imos ir publicando no blog durante unha semana unhas leccións sinxelas do programa da TVG Bem falado, para aprendermos un pouquiño máis de portugués do que xa sabemos por falarmos galego


4.5.20

O GALEGO REINTEGRADO DE CARVALHO CALERO

O autor que este ano homenaxeamos nas Letras galegas era defensor dunha proposta ortográfica diferente á oficial que se chama reintegracionista. El explica que o galego foi, nos Séculos Escuros, unha lingua oral e popular, esquecéndose a tradición culta medieval. Cando se volveu escribir no Rexurdimento, o referente ortográfico era o castelán, a única lingua da escola, e, aínda que moitos intelectuais van defender o achegamento ao portugués, é difícil defender unha proposta que non se pode aprender na escola. Cando, xa en democracia, o galego pode ser ensinado nas aulas e se fixa o que será o noso estándar, Carvalho Calero non acepta a que se vai converter en normativa oficial porque a considera castelanizante e defende que é o momento de fixar unhas normas ortográficas que nos reencontren co portugués, evolución natural da que é a nosa orixe lingüística común: o galego-portugués medieval.

Hoxe en día segue habendo galegos partidarios desta proposta que nos daría unha grande vantaxe de acceso a toda a cultura lusófona. A asociación que os agrupa chámase AGAL. Neste vídeo vannos aprender como ler o galego reintegrado de CARVALHO CALERO.



MAIO, MES DAS LETRAS

Achegámonos á festa das Letras e, aínda que esteamos confinados, queremos renderlle a Ricardo Carvalho Calero, o autor a quen se lle dedica este ano, a homenaxe que se merece. Mirade que ben cantan estas dúas rapazas a súa biografía.


Tamén podes xogar unha partida ao xogo DON DIDARDO do Seminario Galán:


2.5.20

DÍA INTERNACIONAL CONTRA O ACOSO

Esta curtametraxe do alumnado do  IES Macías o Namorado de Padrón invítanos á reflexión neste Día Internacional contra o acoso.

Ás veces, simplemente temos que recordar o que significan as cousas para ser conscientes do que implican as nosas actitudes ou accións. 





CURSO DE LINGUA GALEGA


Desde o próximo día 5 de maio, e durante tres semanas, coincidindo co mes das letras, Nós Diario vai desenvolver un curso de lingua galega centrado na mellora de usos para, desta maneira, aproximarse a unha maior calidade de lingua. Un traballo que conta coa colaboración do Servizo de Normalización Lingüística do Concello de Pontevedra.

Capas das dúas primeiras leccións do curso. (Nós Diario)

1.5.20

30.4.20

CANTÁDEME UN MAIO



A grave crise sanitaria que estamos a atravesar fai que este ano non poidamos celebrar a festa dos Maios na rúa. Queremos sumarnos ao chamamento para que o domingo, día 3 de maio, se che presta, publiques na rede as coplas (letras ou vídeos cantándoas) e as fotos dos Maios feitos co material que teñas na casa. Emprega o cancelo #CantádemeUnMaio nas túas publicacións. Esa iniciativa quere dar a voz a un elemento da nosa oralidade, da nosa cultura, que pide que non a canceles.


E por se non sabes como facer o maio, aí van estes vídeos explicativos sobre como facer un maio tradicional.


e estoutro por se estás nun piso e non podes saír á natureza, para que o fagas con material de refugallo.


TODO O DÍA NA CASIÑA


Magín Blanco preséntanos Todo o día na casa, canción na que describe o día a día  dos máis pequenos e pequenas da casa neste confinamento. A Secretaría Xeral de Política Lingüística promove  este videoclip con animacións da pintora, ilustradora e profesora Luz Beloso e coas voces de grandes referentes da música galega como son Paty Lesta, Uxía, Guadi Galego, Rosa Cedrón, Carmen Rey, Mari Faltri, Paula Romero e María Costa.
Seguro que moitos de vós vos sentides reflectidos na historia que narra a canción.
Ánimo que xa quedou máis!


27.4.20

FÍO DE TEMAZOS EN GALEGO

Engánchate ao  Fío de música en galego que nos propón Hena e enche de música en galego a túa corentena.


26.4.20

25.4.20

O IES de RODEIRA CANTA GRÂNDOLA DESDE A CASA

Era unha das actividades do noso proxecto: despois do achegamento de toda a comunidade educativa ao 25 de abril no Día da Paz, tocaba agora cantar Grândola. O confinamento recluiunos na casa mais non puido deter as nosas ganas de cantar este himno á democracia e á liberdade.



23.4.20

POESÍA GALEGA E BRASILEIRA NO DÍA DO LIBRO

Ela chámase Silvia Penas e naceu en Vigo en 1980. Publicou o seu último libro, Fronteira paraíso, nunha editorial brasileira que ten sede en Pontevedra: a editorial Urutau.


Nesta editorial Urutau tamén publica o brasileiro Augusto Meneghim, poeta e artista plástico do que Silvia Penas nos recomenda  O mar sem nós.



20.4.20

LUZ POZO

Neste tempo de confinamento volvemos falar de perdas. Deixounos Luz Pozo Garza. Quédanos para sempre a súa voz, unha voz que quebrou normas e modelos. Muller culta, voz pública feminina, pensadora e activa con forza propia, lonxe dos convencionalismos estéticos.

Nacida en Ribadeo en 1922 foi poeta, ensaísta, filóloga e catedrática de literatura no ensino secundario e membro da Real Academia Galega desde 1996.

A súa voz poética medra sen medo, con atrevemento, explorando cun sorriso aberto desde aquel poemario O paxaro na boca (1952) nos anos da ditadura ata o seu derradeiro Pazo de Tor (2019). Con Luz fala a soidade, o desamor mais tamén a liberdade, o amor, a sensualidade, a plenitude vital, a transcendencia e o misticismo.

Illas Cíes, poema publicado no libro Prometo a flor de Loto, 1992

Nas Cíes descubrimos a pericia das aves
e a medida celeste onde reside a luz

Bañámonos nas ondas
a compartir sulagos con dóciles palmípedas
e cunchiñas de nacre                                                        

Con labios exaltados bicábasme nas tempas
E querías que fora a raíña dos mares
Ou deslizabas verbas secretas nos oídos

Nos xogos inocentes
Debuxei no teu peito os signos da alegría
Despois grabei na area os símbolos da patria:
espirais
caracolas
esvásticas solares
Cousas do paraíso…

Naquelas latitudes oceánicas azul
azul delirio
tracei como remate un labirinto tácito
para salvar o amor

Aquí podedes escoitar os seus versos, nunha homenaxe a Luz Pozo, na voz de Yolanda Castaño.

16.4.20

APRENDENDO COAS MULLERES GALEGAS QUE DERRUBAN FRONTEIRAS

Unhas sinxelas fichas -un recurso novo da Secretaría Xeral de Igualdade- achégannos,  a seis mulleres galegas das que derruban fronteiras, seis referentes que todos e todas debemos coñecer e dar a coñecer.



Considerada unha das máximas representantes do Surrealismo, a súa obra destaca en todos os ámbitos por unha constante e innovadora evolución artística.

Dedicouse principalmente á literatura infantil e xuvenil acadando un amplo recoñecemento polas obras Anagnórise e Guedellas de seda e liño.

Chegou a Galicia con 23 anos para exercer como mestra preto de Ferrol. Non só ensinou a escribir a nenos e nenas, senón tamén a pais e nais analfabetos. Ademais de mestra foi inventora, deseñando o que se considera o primeiro prototipo do libro electrónico.

Ao longo da súa vida estudou a situación das persoas presas nos cárceres e a condición da pobreza na sociedade.

Estudou Ciencias Naturais e foi a primeira muller en viaxar como científica nun buque de investigación británico. Os seus traballos tiveron especial relevancia e aplicación na oceanografía e na bioloxía mariña.

Ernestina estuda Maxisterio en Pontevedra e logo marcha a Madrid á Escola de Estudos Superiores, sendo unha das primeiras mulleres na universidade.

Podedes atopar as fichas didácticas en: 










12.4.20

STOP MOTION

Desde Aulas Galegas ensínannos con estes interesantes vídeos a aproveitar o tempo de corentena facendo divertidos STOP MOTION. Anímaste?



Aquí tedes o stop motion de Brais Marcos, de 1º da ESO C derrubando fronteiras con música brasileira.



9.4.20

5.4.20

UNHA MENSAXE NUN ANEL

Pode existir un anel que troque a tristeza en alegría? Escoitade un novo conto do Festival Atlántica e resolveredes o misterio.



4.4.20

LETUBERS: SÚMATE AO RETO


Espazo Lectura é un proxecto que naceu hai 14 anos no Val Miñor para fomentar a lectura en lingua galega. Agora, o obrigado confinamento debido á crise do coronavirus, levounos a deixar en suspenso moitas das súas actividades. Por este motivo, están a publicar vídeos de letubers, rapaces e rapazas da comarca que gravan vídeos para recomendar libros en galego que logo comparten coa etiqueta #quedonacasalendocontigo.


DERRUBANDO FRONTEIRAS TAMÉN NAS SERIES

A serie Auga seca convértese a partir deste mércores na primeira serie en lingua galega do catálogo HBO.  A ficción derrubou fronteiras xa que se rodou entre Vigo e Lisboa, en versión orixinal en galego e portugués, producida por Portocabo e SPi --distribuída por DCD Rights--. O 17 de xaneiro estreouse na RTP1 e o 7 de febreiro na TVG e agora convértese na primeria serie galega en incorporarse ao catálogo de HBO España e Portugal, tras a adquisición dos dereitos de emisión. 

É un thriller que vira ao redor de tráfico de armas e as súas conexións co mundo empresarial. Nel, a actriz portuguesa Vitoria Guerra traballa á beira dos recoñecidos actores galegos Monti Castiñeiras e Sergio Pazos como protagonistas. Os actores galegos Eva Fernández, Pomba Saavedra, Santi Romay, Cris Iglesiaas, Adrián Ríos e os portugueses Adriano Luz, Joana Santos, Igor Regala e João Arrais son algúns dos nomes que completan o elenco internacional da serie.




2.4.20

LER NA CASA

As editoriais galegas estánnos a ofrecer oportunidades para que maiores e pequenos poidamos ler en galego desde a casa.

Baía editorial: con vós na casa



Xornal O Papagaio: Olla o papagaio.


Laiovento: descarga gratuíta de Os monos de Laxeiro.

Carrindola: banda deseñada

Moitas grazas!!!



O CONTO NON PARA. DERRUBANDO FRONTEIRAS.

O festival Atlántica de narración oral que se ía celebrar o 20 de marzo suspendeuse pero os contadores e as contadoras non están dispostos a deixar de contar e por iso están colgando en youtube historias chegadas de Brasil, Uruguai, Colombia, Madeira, Salamanca, Zamora, e unha ampla mostra de talento galego e novas voces que están a xurdir.

Aquí temos unha nova oportunidade de escoitarmos o portugués e o galego dándose a man e derrubando fronteiras.



1.4.20

O MELLOR CONSELLO: ACHÉGATE AO PORTUGUÉS

En tempos de corentena, aproveitemos o tempo para practicar o noso portugués. Escoita os consellos deste menino, moi apropiados para o momento e dime se non cres que xa temos moito camiño andado.


OS BURRIÑOS DO 1 DE ABRIL TAMÉN DERRUBAN FRONTEIRAS

Sabías que hoxe é o noso día das bromas? Se levas tempo no IES de Rodeira, seguro que si. Cada ano lembramos esta nosa tradición, diferente a do Estado español que celebra o 28 de decembro e común a Portugal e Brasil. Niso somos moi europeos xa que o 1 de abril  celébrase tamén en Alemaña, Reino Unido (April Fool´s Day), Portugal, Polonia, Italia, Austria, Finlandia ou Francia (Poisson d´avril); e tamén en Estados Unidos e Australia, igual que en Galiza, o día dos trucos, do engano, das brincadeiras, é o 1 de abril. Así o asegura o refrán galego: “O un de abril van os burros onde non deben ir” que figura nos adhesivos conmemorativos que o EDLG do instituto reparte sempre por esta data e que hoxe saen no xornal Nós diario. Tamén saímos á rúa outros anos preguntarlle á xente que nos contou moitas historias de como de nenos lle tomaron o pelo mandándoos levar varios quilómetros paquetes que, ao chegar ao seu destinatario, resultaron ser ladrillos, por exemplo.


Practiquemos o portugués descubrindo cal é a orixe desta celebración.


Origem do Dia das Mentiras
O Dia das Mentiras surgiu por brincadeira na França, no reinado de Carlos IX. Nessa época, o ano novo era comemorado a 25 de março, com a chegada da primavera. As festas, que incluíam troca de presentes, duravam uma semana e terminavam a 1 de abril.


Em 1564, com a adoção do calendário gregoriano, o rei decidiu que o ano novo deveria passar a comemorar-se a 1 de janeiro. Alguns franceses não aceitaram a mudança no calendário e continuaram com a tradição antiga. A população que adotou o novo calendário decidiu então brincar com os "conservadores" enviando-lhes presentes estranhos e convites para festas inexistentes. Com o passar do tempo, a brincadeira alastrou-se a outros países da Europa e, mais tarde, para outros continentes.

E agora escoitamos



31.3.20

FRANCO GRANDE

Moitos o coñecemos por un dicionario galego-castelán de pastas vermellas que comezou a circular nos tempos da ditadura. Nacido en Tomiño en 1936, Xosé Luís Franco Grande recolleu nel máis de 40.000 palabras nunha obra que formou parte da educación de moitxs escritorxs e lectorxs que aínda seguiamos consultando as súas páxinas cando non atopabamos as palabras de noso nos dicionarios normativos.



Tamén destacou a súa obra literaria nos tempos da resistencia, nos que se sumaría á fundación na clandestinidade do PSC. Vieiro Choído como dramaturgo en 1957, Entre o si e o non como poeta en 1967, como ensaísta Os anos escuros. A resistencia cultural dunha xeración, en 1985.

O noso recoñecemento ao poeta, ao memorialista, ao recolector de palabras, ao loitador pola democracia que nos vén de deixar hoxe.




ENREGUÉIFATE 2020

Malia a estado de alarma, o Enreguéifate botou a andar este ano para animar a pequenos/as e maiores a pasar o tempo agudizando o enxeño a través da arte da regueifa. 

Enreguéifate é un proxecto impulsado polos concellos de Ames, Pontevedra, Rianxo, Santiago de Compostela e Teo que apoia a difusión da improvisación oral en verso (regueifa) para contribuír, por medio dela, á promoción do uso da lingua galega. Aínda que houbo que renunciar aos obradoiros, mantense o concurso de vídeos regueifando. Está aberto o prazo ata o 29 de maio. Anímate!



27.3.20

GALICIA LE


Queredes ler pero non tedes libros na casa? A Xunta de Galicia vén de solucionar o problema poñendo en aberto a plataforma de préstamo de obras en formato electrónico das bibliotecas públicas galegas: GaliciaLe. Así poderedes descargar en ordenadores, tablets ou móbiles obras en formato dixital  máis de 4.500 títulos, dos que a maioría están en galego e en castelán, pero tamén os hai en inglés, portugués, francés, italiano, catalán e éuscaro, libros infantís, xuvenís e para adultos. Ademais suma 31 revistas e 300 audiovisuais feitos en Galicia que comprenden longametraxes, curtas ou documentais.
Para facilitar o acceso a esta plataforma só é necesario rexistrarse mediante o formulario dispoñible na páxina web de GaliciaLe. Tras cubrir o formulario, o usuario recibirá no seu enderezo electrónico as claves para acceder a plataforma. Cando remate o estado de alarma, os usuarios disporán dun período de 30 días para e recoller o seu carné e seguir gozando das vantaxes da rede de bibliotecas públicas de Galicia e desta plataforma.



Como complemento a esta iniciativa, os arquivos xestionados pola Xunta (Arquivo de Galicia; e históricos, do Reino de Galicia, Lugo, Ourense e Pontevedra) propoñen una viaxe polo tempo dentro da nosa Comunidade. Entre os diferentes recursos destacan exposicións virtuais en 3D e percorridos 360º ou as mostras do Arquivo do Reino, a última das cales foi publicado o pasado 8 de marzo, co gallo do Día internacional da Muller, e que leva por título Meigas, feitizos das menciñeiras: procesos xudiciais por bruxería.


Ademais, e aínda que os museos xestionados pola Xunta non están abertos, podemos explorar as súas coleccións e as actividades que se realizan neles ao través do mundo dixital. Na maioría deles pódese facer un percorrido completo polas súas salas expositivas e contemplar as obras expostas como se se estivera no interior, con información complementaria.

Tres boas opcións de visitas virtuais para comezar, por ser centros estar afastados das cidades e a súa interesante proposta museográfica, son o Museo do Castro de Viladonga e ao propio Castro, o Massó e as Pallozas e conxunto etnográfico do Cebreiro. Ademais, pode facerse unha visita virtual polos espazos de todos os museos xestionados pola Xunta.

26.3.20

PANTALLAS 3D no IES de RODEIRA

O Departamento de Informática do noso instituto, ante as dificultades de conseguir material de protección para os sanitarios, puxo a funcionar as impresoras 3D e está a fabricar unhas 40 pantallas diarias que xa están empregando no Centro de Saúde de Cangas. Parabéns polo voso traballo!!!


21.3.20

FELIZ DÍA A ÁRBORE E DA POESÍA

Xa que non podemos celebralo no instituto, terémonos que conformar con facelo desde as nosas casas.

Para que non poida ver as árbores desde as súas ventás, aquí vos deixo un vídeo, que active a forza da imaxinación porque esa si que non sabe de confinamentos.



20.3.20

PANDEMIA DE CONTOS


Pandemia? Si, mais de contos! Esa é a proposta virtual que desde o colectivo NOGA, Narración Oral Galega, botaron a andar para vivir en positivo estes días de illamento.
Aquí tedes o primeiro pero prometen un por día na súa canle así que atentos!!!






E A PRIMAVERA CHEGOU

Aínda pechados notamos que os días medran e hoxe celebramos o comezo da primavera. Boa ocasión para retomar o noso contacto co portugués con este fermoso vídeo no que escoitamos un poema de Irene Vella na voz de Rui Unas.

19.3.20

SON DA CASA

O talento galego non deixa de poñerse ao servizo de cantos estamos recluídos na casa. E a música non ía ser menos. O festival Son da Casa convídanos no torreiro do noso Instagram mañá venres e o sábado 21. 

Aquel-e será o mestre de cerimonias: