21.12.12

TI ES PARTE DUNHA CULTURA CON LINGUA DE SEU. ACTÍVATE E REGALA GALEGO NO NADAL



No tempo previo ao Nadal, contactamos con FECIMO (Federación de Comerciantes e Industriais do Morrazo) e con distintas empresas culturais, de camisetas con lemas en galego e de alimentación etiquetados en galego, ofrecéndolle publicitar os seus produtos nunha gran exposición na planta baixa do noso centro baixo o lema REGALA GALEGO, que invitase a valorar a utilización da lingua propia nas empresas como marca de distinción e calidade. Con todo iso montamos unha exposición que xa podedes ver na planta baixa do instituto de Rodeira. Fixemos andeis con caixas de froitas para os produtos de alimentación etiquetados en galego, xunto a unha mesa de Nadal con menús en galego dalgúns restaurantes de Cangas e outros feitos polo alumnado; no centro, unha versión máis pequena da cúpula xeodésica presentada a Galiciencia, construída tamén polo alumnado de Tecnoloxía, colocada sobre tea verde, forma unha orixinal árbore de Nadal, chea de agasallos en galego. O espazo reservado para FECIMO está adornado con material das súas propias campañas. O de banda deseñada forrouse con páxinas a toda cor da revista Galimatías. Para o espazo dos libros e da música, pedimos ás editoriais carteis e marcapáxinas. O taboleiro con recomendacións para os máis cativos ilustrouse con fotos de nenos e nenas gozando cos libros infantís en galego, fillos e fillas de profes ou irmáns pequen@s do noso alumnado. Esperamos que vos guste. Non esquezas o noso consello e REGALA GALEGO este Nadal.



En colaboración cos outros centros do Morrazo, editamos folletos con recomendacións de lectura e audiovisual para infantil, primaria, secundaria e para as familias.


Recomendacións para infantil

 
Recomendacións para primaria:



 
Recomendacións para secundaria:

 

20.12.12

TI ES PARTE DUNHA CULTURA MODERNA CON LINGUA DE SEU. ACTIVA O GALEGO NO TEMPO DE LECER E NA CULTURA URBANA.



Así rematamos o trimestre. Cunha festa en galego para o alumnado que asistimos ao longo de todo o trimestre aos equipos de conversa do EDL. Entramos con invitación, poñiámonos o selo do equipo e colliamos unha peza do xogo da torre que iamos colocando postas de pé como un dominó formando un gran G, mentres se proxectaban fotos de todas as actividades xa realizadas das que fomos protagonistas.

Como invitado especial contamos coa presenza de CARLOS GENDE (Gendebeat). Coa axuda da rede, achegounos á música galega actual, especialmente de rap e reggae, rompendo os prexuízos que a ligan exclusivamente ao folc. Nun pequeno obradoiro, que foi todo un éxito, puidemos probar a facer beatbox.

Para rematar, tombamos as pezas do noso dominó con forma de G simbolizando a forza que cada quen representa para poñer en marcha aos demais e compartimos o que levaramos de comer. Moito galego no Nadal e para o ano volvede con máis forzas.



12.12.12

EU FALO GALEGO PORQUE SI



Ao rematarmos o ano do centenario do nacemento do poeta celanovés Celso Emilio Ferreiro, unha das voces fundamentais da literatura galega da segunda metade do século XX, a Coordinadora Galega de Equipos de Normalización e Dinamización Lingüística (CGENDL) propuxo aos centros de ensino renderlle homenaxe pública cunha acción de carácter colectivo que simbolizase toda a forza e enerxía que transmite a súa palabra, símbolo permanente de valores de solidariedade e xustiza universais, pero tamén de compromiso cívico coa cultura e lingua de Galicia.

No IES de Rodeira invitamos á toda a comunidade educativa a gravar versos recitados ou adaptados do seu poema Deitado frente ao mar, incluído en Longa noite de pedra. Este mércores, 12 de decembro do 2012, ás 12 da mañá, estreáronse no instituto. Así foi como quedaron.


 

 

10.12.12

TI ES PARTE DUN MUNDO QUE PODE SER MÁIS XUSTO. ACTIVA O GALEGO NA DEFENSA DOS DEREITOS HUMANOS.





Na celebración do Día dos Dereitos Humanos, abrimos unha xanela ao mundo desde a reflexión nas titorías para avaliar o grao de cumprimento dos obxectivos do milenio (2000-2015) cando nos estamos a achegar á fin do prazo establecido.


De 3.- 10 dec dereitos humanos




A partir da exposición “O prometido é débeda”, repasamos os obxectivos á que se comprometeran os países membros das Nacións Unidas, entre eles España. Houbo avances pero aínda quedan importantes pasos por dar, en perigo polo recorte de orzamentos. De novo a crise económica prexudica aos máis débiles. Con gráficas e estatísticas comprobamos que non só non avanzamos na consecución do 0’7% do PNB prometido senón que desde o 2010 houbo recortes que sitúan a nosa contribución no 0’4%, claramente insuficiente para cumprir os Obxectivos do Milenio. Lembramos unha vez máis que todos e todas somos parte e debemos meterlle presión aos políticos para que os nosos impostos axuden a cumprir estes obxectivos que son de xustiza, indispensables para que se poidan garantir os Dereitos Humanos en todo o planeta.












26.11.12

TI ES PARTE NA SUPERACIÓN DE PREXUÍZOS E DISCRIMINACIÓNS E NA LOITA POLA IGUALDADE. ACTIVA O TEU COMPROMISO E ÚNETE Á CADEA CONTRA A VIOLENCIA DE XÉNERO




Hoxe 26 de novembro, profesorado e alumnado do IES de Rodeira formamos unha cadea chea de mensaxes contra a violencia de xénero, froito da reflexión previa feita nas aulas, á que tamén invitamos a pais e nais e persoal non docente, que percorreu o paseo marítimo de Cangas

O alumnado maior, o de 2º de Bacharelato, encabezou a cadea coa mensaxe NON A VIOLENCIA DE XÉNERO. A chuvia parou e o sol decidiu acompañarnos na tarefa de invitar á xente de Cangas a sumarse ás nosas propostas entregando un pequeno escrito á xente coa que nos cruzamos:


De 2.- 26 nov.violencia de xénero


Ao chegar ao final do percorrido, Nerea, de 2º Bacharelato D, leu o manifesto que pechamos o noso acto reivindicativo.


MANIFESTO



NON Á VIOLENCIA DE XÉNERO!! Hoxe atopámonos aquí realizando esta cadea humana que pretende simbolizar dúas cuestións. Por unha banda busca ser o símbolo da unión e o apoio sen fisuras que entre todos e todas nós lle ofrecemos a todas as persoas que sexan vítimas da violencia de xénero. Pola outra busca concienciarnos de é unha tarefa de todos e todas perseguir como unha sombra implacable o machismo e a violencia que o acompaña ata a fin dos seus días.



Estamos fartos e fartas da violencia. Estamos fartos e fartas de que haxa persoas que consideren que outras son menos ca eles. Estamos fartos e fartas de quen pensa que alguén é a súa posesión, a súa “cousa”. Así que ante esta situación dicimos BASTA!



No período comprendido entre 2003 e 2011 houbo 605 mulleres asasinadas polas súas parellas. Tan só no 2011 foron 61 as mulleres que perderon a súa vida a mans do seu agresor e 343 as que se rexistraron como vítimas de violencia. E sabemos que os números reais son moi superiores a esta cifra.



Non queremos mirar para outro lado. Debemos actuar en todas e cada unha das ocasións que se nos presenten. E defender unha escola que non só nos forme en coñecementos senón tamén en valores, na igualdade e no respecto ás persoas, unha escola que rexeite todo tipo de violencia e eduque no diálogo como xeito de superación de conflitos.



CONTRA O MALTRATO ÁS MULLERES, TOLERANCIA CERO!

NON Á VIOLENCIA DE XÉNERO!









24.11.12

O IES DE RODEIRA EN GALICIENCIA 2012



Alá nos fomos, tal día coma martes, co baúl con rodas que nos fixo Juan e os rabos de basoira recollidos entre dous paragüeiros; parecíamos tres aprendices de caddy nun campionato de golf. A entrada na residencia de Allariz foi triunfal pois a caixa-contedor, onde gardaban os proxectos, máis traballada dos outros centros era de cartón pegada con papel de celo.

Ás oito da mañán do mércores estabamos todas as equipas montando os proxectos no Parque Tecnolóxico de Galicia, en San Cibrao de Viñas; o do IES RODEIRA montámolo fora da carpa por ter unhas dimensións excesivas e non teren previsto un lugar axeitado no interior, isto que en principio parecía un inconvinte enseguida Nerea e Juan David o volveron en vantaxe.

Os proxectos clasificábanos por niveis de estudo: primeiro ciclo do ESO, segundo ciclo do ESO e bacharalato; o noso entraba en segundo ciclo do ESO. Había un total de 45 traballos seleccionados que estaban relacionados coa: física, química, bioloxía, electricidade, informática, tecnología, literatura, comportamento animal, etc. A cúpula xeodésica desmontable que presentamos nós, por ser unha estrutura fixa podiamola calificar de obxecto tecnolóxico. Todos os traballos procedían de centros de ensino públicos ou privados de Galicia excepto dous procedentes de Cataluña.

Os tres días de exposición supuseron un total de dez horas de atención ao público visitante, a grande maioría eran alumnas e alumnos de diversos colexios, e tiñamos que explicarlles en que consistía o noso proxecto. A recepción do público era no estand dentro da carpa, pero a explicación nós tiñámola que dar fóra o que nos descubreu unha nova virtualidade do noso trebello: as visitas confundíano co mobiliario urbán e decorativo que adornaba o entorno da sede de TECNÓPOLE e non daban creto que aquilo o construísen nun taller de tecnoloxía, ata que Nerea ou Juan David coas súas explicacións os convencían da verdadeira realidade do traballo.

O proxecto que resultou gañador absoluto foi un coche eléctrico presentado polo IES Rosalía de Castro de Santiago. Había proxectos que estudaban a biodiversidade en Bouzas e Toralla, a recuperación do monte despois dun incendio, a posible contaminación dos alimentos, a base cientifica dos perxoaxes de ficción do Romanticismo, etc.

Arredor de duas mil persoas pasaron pola carpa. Fóra da recepción e exposición ao público houbo diversas actividades de divulgación científica, presentación do libro “Dos quarks á próxima extinción”, unha visita guiada ao casco histórico de Ourense e unha sesión de reláx nas termas de Outariz.

O venres, xa de volta en Cangas descargamos os trebellos ao pé do Areeiro e Mucha preguntóunos se viñamos do golf de Domaio, dixémoslle que non que viñamos do de Ourense.


21.11.12

TI ES PARTE DUN CONCELLO. ACTÍVATE, PONTE A CAMIÑAR E DESCUBRE A RIQUEZA MEDIAMBIENTAL DO FACHO


Este curso propuxémonos mellorar, xunto coa nosa cultura, a nosa saúde física e mental, facendo rutas camiñando pola fermosa natureza do noso concello . Por iso collemos as mochilas para visitar un dos nosos espazos máis privilexiados, integrado na Rede Natura 2000: o Facho, a Costa da Vela, Cabo Home e a Praia de Melide, regresando pola praia de Barra.

Primeiro subimos pola calzado romana ata o monte Facho. Alegrounos moito ver que estaban de novo a traballar nas tarefas de escavación do castro que rodea o monte. Chegamos ata o cume, onde repasamos a historia deste lugar máxico, fogar de castrexos e santuario do deus Berobreo ao que os galaico-romanos ofrecían aras pedindo pola súa saúde. Desde alí divisamos o perfil das rías recortándose no mar e, ao fronte, as illas de Ons e Cíes, estas últimas tan preto que parece que se poden tocar coa man. Respiramos sentad@ nas rochas do cume do monte, cara a inmensidade do mar e a beleza da paisaxe e sentimos unha gran paz interior.



Continuamos camiño en dirección a Cabo Home, aprendendo os nomes dos lugares, das especies autóctonas e das invasoras, da flora e da fauna, do impresionante relevo da Costa da Vela e do areal da praia de Melide. Regresamos en dirección á praia de Barra pero a chuvia, que xa nos acompañara en pequenos tramos, comezou a caer seguido e o regreso resultou un pouco precipitado. Aínda así chegamos ao instituto contentos polo exercicio físico realizado (calcularemos en mates as calorías consumidas), e tamén orgullos@s de coñecermos mellor esta impresionante paraxe que temos tan preto de nós e dispost@s a transmitir o aprendido a familia e amig@s.


12.11.12

MAGOSTO


Xa tocaba poder celebrar o magosto cun fermoso día de sol, compartindo castañas e danzas galegas e do mundo. Estivestes un pouco tímidos ao principio, pero pouco a pouco foise animando a festa. Para rematar, como ten que ser, tod@s emborrallad@s.

9.11.12

DIA DA CIENCIA EN GALEGO



Se queremos que o galego sexa unha lingua de futuro non podemos renunciar a que sexa lingua da ciencia e da tecnoloxía. E ese camiño comeza no ensino. Porque é aprendendo en galego matemáticas ou física, tecnoloxía, informática ou electrónica; formulando, investigando, montando circuítos, aprendendo a programar ou experimentando no laboratorio... como entendemos que a nosa lingua non nos limita senón que nos enriquece e nos prepara para o diálogo con todas as culturas do mundo.

Para expresar este desexo celebramos no instituto o Día da Ciencia en galego. O día 5 de novembro, o alumnado de bacharelato puido coñecer de primeira man como científicos galegos, do CERN e mais da Universidade de Santiago, investigan sobre física de partículas a través dunha videoconferencia na que os escoitaron falando en galego desde diferentes lugares do mundo e mesmo estableceron contacto con eles vía chat.

O día 8 montouse unha cúpula xeodésica deseñada polo profesor Antón Pousada e elaborada polo alumnado da ESO na aula de tecnoloxía ao longo do pasado curso e rematada no actual.

A cúpula xeodésica está elaborada con 65 mangos de vasoira que forman unha estrutura de 30 triángulos para dar forma a unha cúpula xeodésica de 2,3 metros de altura e 4,6 metros de diámetro. A unión dos lados da cúpula (mangos de vasoira) faise mediante 16 conectores elaborados previamente por alumnas e alumnos de 2º e 3º do ESO. Estes conectores son de dous tipos; un conector está feito con 5 triángulos isósceles e o outro está formado por 4 triángulos isósceles e 2 equiláteros. En total suman 150 triángulos de contrachapado de madeira que construíron as alumnas e alumnos no taller de Tecnoloxía.
Este proxecto do departamento de Tecnoloxía do IES de Rodeira foi seleccionado para Galiciencia 2012, evento que terá lugar os días 20, 21, 22 e 23 deste mes de novembro dentro da Semana da Ciencia que se celebra en San Cibrao das Viñas, Ourense. Acudirá o profesor Antón Pousada, acompañado dunha alumna de 3º da ESO, Nerea Dios González, e dun alumno de 4º do IES RODEIRA, Juan David Molanes Pazó, que montarán a cúpula e explicarán o desenvolvemento dun proxecto ideado para traballar dun xeito práctico parte dos contidos da materia de Tecnoloxía en 2º e 3º do ESO (expresión gráfica, manipulación de ferramentas e materiais diversos, construción de estruturas...). Parabéns!!!

Nas aulas, o alumnado elaborou unhas flores azuis e brancas dentro dun corazón cun dispositivo que lles permitía saír voando. O acto celebrouse no pavillón botando a voar as flores que simbolizaban o galego ao redor da cúpula xeodésica mentres o coordinador do Equipo de Dinamización da Lingua galega, Manuel Sánchez, reivindicaba a presenza do galego no ensino da ciencia e na tecnoloxía.

6.11.12

SAMAÍN


Aquí tedes as propostas presentadas ao noso concurso de creación: pequenos escenarios a partir de caixas de terror, con pedras, ramas, terra e algodón que recrearon ambientes das nosas historias de terror; personaxes feitos con masa de modelar, plastilina, arame... ou o que aparecese polo faiado da casa... Corredores convertidos en túneles de terror e aulas que metían medo; murais, banda deseñada, e coroas matemáticas para uns mortos moi curiosos.


O primeiro premio foi para a aula de 3º B que, partindo dun relato inventado por Sara, ambientou a aula e organizou dous pases de representación: un para o xurado e outro para público interesado. Aquí podedes ver as fotos e o vídeo. E tamén o mural gañador dun grupo de alumnas e alumnos de 2º de bacharelato B.
 A actividade máis divertida foi unha xincana de probas sobre a exposición do Samaín na que o alumnado de 1º ESO A demostrou coñecer os poderes ocultos das forzas do universo e ser merecente do diploma de cazapantasmas e dunha chea de gominolas terroríficas.

23.10.12

UNHA SEMANA CON SABOR A FROITA



Que pasa esta semana que o alumnado de 2º da ESO está a ofrecernos mazás, plátanos e peras nos recreos? A explicación está en que o noso instituto está a participar este curso no Plan de consumo de froita nos centros escolares, organizado polo FOGGA (Fondo Galego de Garantía Agraria) cunha subvención da Unión Europea. Concedéronnos cartos para repartir froita dúas semanas ao longo do curso entre o alumnado da ESO e esta é a primeira delas. Esta actividade forma parte dun proxecto educativo máis amplo. Por iso estamos a falar nas aulas sobre a importancia dunha alimentación adecuada, estudando as propiedades da froitas, a súa composición, a súa achega de vitaminas e de fibra, as súas propiedades curadoras que tamén podedes ver nos murais da planta baixa.

Nós, os de 3º da ESO, escollemos como slogan Unha semana con sabor a froita e deseñamos os carteis que atopastes polas portas.
 

Aínda estás a tempo de anotarte se queres participar na campaña publicitaria para promocionar o consumo de froita facendo anuncios en galego... E xa sabes: se estás na ESO, non deixes de pasar pola planta baixa nos recreos a recoller a túa peza de froita. Temos plátanos, peras e mazás de varios tipos, está toda boísima. Lembra que TI ES PARTE do coidado da túa saúde. ACTÍVATE e come moita froita!!!


E non esquezas que os restos da froita non se tiran co lixo. Recollémolos nos cestos de plástico de cores para facer compost. Algún día tocaravos ver como se fai e visitar os compostoiros que hai no horto do instituto. Polo momento, tes na planta baixa carteis explicativos que mesmo che ensinan como facer o teu propio compostoiro. Porque tamén SOMOS PARTE do coidado do planeta en que vivimos, ACTÍVATE e recicla.


O alumnado de 1º do CM de Xestión Administrativa e a súa profesora Marga encargáronse de contratar o envío da froita e de levar o control dos albaráns e das facturas. Acertastes na escolla, a froita está boísima e chega puntualmente ao centro.




12.10.12

EXPLICANDO A NOSA SITUACIÓN LINGÜÍSTICA

Andrea, ex-alumna do instituto e dos equipos e estudante de Ciencias da Comunicación en Madrid, veu entrevistarnos para contarlle aos seus compañeir@s e profesor@s madrileñ@s e a quen o queira ver na rede (http://www.youtube.com/watch?v=7-A9U0g1o3A) cal é a nosa situación lingüística. Aquí tedes uns fragmentos da súa conversa con profesorado e alumnado do Equipo de Dinamización da Lingua Galega.

Lingua e Mocidade from lingualiza on Vimeo.


10.10.12

CELEBRA O SAMAÍN!




Somos parte dunha cultura con identidade propia. Por iso, o Equipo de Dinamización da lingua galega invítavos a celebrar o SAMAÍN, activando a vosa creatividade e participando no concurso máis terrorífico do ano. A noite do 31 de outubro (segundo a tradición celta) ábrese a porta que separa o mundo dos vivos e dos mortos. Inspirándonos na nosa tradición propia de historias de terror (santa compaña, homes e mulleres lobo, fantasmas e aparecidos, homes do saco e chuchasangues, meigas e meigallos, demos e avisos da morte, retranca e humor macabros, cabazas talladas acesas...) abrímonos tamén á cultura universal e aos novos seres do terror do cine e da televisión... Historias, fotorrelatos, dramatizacións, banda deseñada, murais, traballos manuais e sobremesas coas instrucións en galego, fotos con disfraces terroríficos, epitafios, maquetas, papiroflexia... Tamén podedes investigar sobre mortes famosas ou sobre como se celebra o SAMAÍN ou como é o mundo do terror noutras culturas. Todo cabe no noso concurso. Podedes facelo de xeito individual ou en grupo (haberá premios para as aulas que máis participen), mostrándonos os traballos a semana do 22 de outubro. Activa a túa imaxinación e creatividade e ATERRORÍZANOS...



Aquí tedes unhas presentacións de relatos e banda deseñada da nosa rica tradición cultural para que vos inspiredes:

Terror galego


Terror na banda deseñada
 










26.9.12

UNHA PEZA DA TORRE



Xogaches algunha vez ao xogo da torre?

A torre: unha lingua e unha cultura construídas ao longo dos séculos. Nós somos as pezas que a formamos. Se non nos comprometemos, á torre vanlle faltando pezas e remata por derrubarse.

A torre: o noso equipo de dinamización. As pezas: o compromiso individual de falar en galego. Se faltamos ao compromiso, todo o equipo se resente e, como a torre, rematará por derrubarse.

Na 1ª reunión do equipo de normalización xogamos á torre e reafirmamos o noso compromiso de falar en galego nas reunións e actividades. Simbolizamos “tuneando” a peza que nos representa: todas diferentes pero formando parte dun proxecto común: manter en pé a torre dunha cultura construída en galego. Tamén organizamos os grupos e as reunións: se sodes de 1º da ESO vide o luns; de 2º, o martes; de 3º, o mércores; de 4º, o xoves; e de bacharelato e ciclos, o venres. Sempre no 2º recreo, na sala de usos múltiples.




24.9.12

XA ES PARTE DO EQUIPO?



Ao longo da primeira semana de clase viñestes anotarvos máis de cen alumnos e alumnas de todos os niveis educativos. Asinastes o voso compromiso pintando o perfil da vosa man nun gran cartel co lema deste curso. Se aínda non o fixeches, corre a anotarte nos segundos recreos.

17.9.12

TI ES PARTE

Xa está en marcha a nova campaña para poñer a andar o Equipo de Dinamización este novo curso 2012-2013. Todos e todas formamos parte dunha comunidade que ten lingua de seu e recibimos dun xeito ou doutro ese legado que en moitos casos está durmido dentro de nós. Actívate! Xa é hora de que comeces a falar galego! Dá un paso adiante e apúntate ao equipo de Dinamización. Agardamos por ti nos segundos recreos!


27.6.12

BRASILEIR@S-GALEG@S: UMA LÍNGUA QUE NOS UNE





A finais de maio, coincidindo coa día universal da biodiversidade e co da diversidade cultural, celebramos no instituto a Semana Intercultural. Nela incidimos cada ano no lema: DIFERENTES SI, DESIGUAIS NON. Facémonos conscientes da variedade de ecosistemas, especies animais, persoas, razas, culturas e linguas que forman o mundo e asumimos a diversidade como un valor positivo que nos enriquece e debemos preservar. Defendemos o intercambio cultural desde o respecto e a igualdade, que faga posible o entendemento na construción dun mundo onde todos e todas teñamos cabida. E simbolizámolo asumindo toda a comunidade educativa unha tarefa común que se enriqueza coa variedade creativa de todos e todas cantos queiran colaborar. Así cosemos unha manta de pastwork, pintamos mandalas ou atamos unha rede multicolor. Este curso decidimos CONECTARNOS elaborando NEURONAS que, como as do noso cerebro, se uniron a outras establecendo relacións que nos enriquecen como persoas.






E, para celebrarmos a diversidade, decidimos achegarnos a BRASIL, unha cultura afastada no espazo xeográfico e, á vez, moi achegada a nós desde o berce común do seu portugués brasileiro e o noso galego. Todos os textos da exposición estaban escritos en brasileiro e invitamos a cantos se achegaron á exposición a comprobar que é moi fácil de comprender desde o galego. E fixémolo desde o mundo do fútbol xa que son moitos os futbolistas brasileiros que coñecemos aínda que esta vez puidemos ler a súa ficha, declaracións e entrevistas e tamén ver varios vídeos, todo en brasileiro. E entendémolo fenomenal!

Tamén fixemos mapas para explicar a diversidade de biomas, de culturas e de linguas e aprendemos algo das súas tradicións como o “bumba meu boi” que decorou a entrada do instituto xunto con información e reproducións en cerámica de personaxes como os retirantes, os cangançeiros, o Lampiao ou Maria Bonita. E tamén nos achegamos ás súas lendas que veu ler para nós unha muller brasileira, cheas de tradicións parecidas ás nosas como a do homelobo ou a Santa Compaña e outras que nos resultaron sorprendentes. Desde a Biblioteca descubríronnos a literatura de cordel, historias que, como en Galicia, se cantaban polas feiras no pasado pero que alí aínda se seguen escribindo hoxe, unha literatura popular que reflexiona a través dos versos sobre a vida mesma e todo canto acontece ao noso redor. Nas aulas pasáronse vídeos en brasileiro de contos infantís sobre a riqueza da diversidade ou sobre música de actualidade.




FALANDO GALEGO EN CATOIRA



Intercambio de Normalización Lingüística



A xente nova en Catoira fala galego sempre con toda normalidade. O alumnado de 3º e 4º de Catoira invitou ao noso alumnado de normalización de 2º, 3º e 4º a practicalo pasando con eles o día e coñecendo a súa vila.

Fixemos unha ruta camiñando desde o centro de Catoira, onde está o seu cole ata Abalo, un outeiro onde hai muíños de vento tradicionais e unhas fermosas vistas sobre o río Ulla e a súa desembocadura na ría de Arousa.

Despois seguimos o paseo do río Catoira ata chegar ás Torres do Oeste, o monumento máis emblemático de Catoira. Son os restos dunha fortaleza medieval que impedía o paso dos normandos e sarracenos. Aquí se celebra o primeiro domingo de agosto a romaría vikinga, festa de interese turístico nacional. Para o desembarco dos invasores construíronse varias reproducións de dakars da época. Nun deles fomos dar un paseo polo río Ulla.

Comemos e pasamos unha tarde moi agradable de convivencia no parque da praia de Catoira.

Quedaron invitad@s a devolvernos a visita a principios do próximo curso. Xa estamos desexando ensinarlle Cangas e pasar con eles un día de festa.


16.5.12

PALABRAS CHEAS DE VIDA A TRANSFORMAR O MUNDO


Recuperar as palabras que os galegos e galegas foron creando e transmitindo de xeración en xeración: ese foi o xeito que escollemos para celebrar este ano as LETRAS GALEGAS.

Cómpre loitar contra o silencio;

é preciso, urxente e necesario

rematar co silencio dunha vez...
Recobremos as palabras

unha

a

unha,

fagamos con elas proclamas e cancións,

primaveras de soños e esperanzas,

coiteladas de luz,

voz verdadeira

que obrigue a camiñar á nosa Patria.

(Adaptación dun poema de Manuel María)


Cada aula que se uniu á celebración, pola mañá e pola tarde, votou a palabra que máis lle gustaba. O día da celebración baixaron a colocar as letras da súa palabra no chan do patio formando entre todas un gran encrucillado.




Tamén quixemos compartir estas palabras coa xente de Cangas atándoas do valado que rodea o instituto coas súas definicións. Castelao, Manuel María, Ferrín, Luz Pozo, Uxío Novoneyra, Avilés de Taramancos, Marta Dacosta e María Rosendo invitáronnos coas súas fermosas palabras á reflexión sobre a importancia de seguir dándolle vida a este tesouro que nos foi transmitido.





Reunímonos logo no patio para celebrar a Festa das Letras Galegas, dedicada este ano a VALENTÍN PAZ ANDRADE, un home de letras, poeta e xornalista que tamén foi avogado e empresario. Sentir Galicia era para el unha tarefa que se tiña que concretar en proxectos económicos que nos encamiñasen a un futuro mellor e nos que traballou de xeito incansable.




Neste pequeno acto, presentado por Ana e Luís, de 2º da ESO, o Equipo de Dinamización fixo entrega dos premios FALAMOS GALEGO a iniciativas en defensa do galego dentro e fóra do centro. Esta era sen dúbida a mellor ocasión para recoñecer o importantísimo traballo normalizador realizado por FECIMO, Federación de empresarios e comerciantes do Morrazo, destacando dun xeito especial, a creatividade das súas campañas publicitarias nas rúas e na rede e os libros publicados sobre a nosa comarca. Foi para nós unha honra recibir no instituto para recoller a placa FALAMOS GALEGO a Xosé Bangueses, presidente de FECIMO.



Como manda a tradición neste día o Equipo de Normalización distinguiu tamén o compromiso co galego dun colectivo do centro. Este ano quixemos agradecer o apoio á normalización do galego realizado desde a BIBLIOTECA do centro, entregando a placa FALAMOS GALEGO á súa coordinadora, Majo, e ao profesorado do seu equipo: Alba, Begoña, Quique, Esperanza, Moncho, Carlos, Gema, Pilar, Isabel e Rojas.



Son anos de recortes e os orzamentos do Equipo non están para moitas festas. Pero quixemos deixar constancia, unha vez máis, da sorte de contar con moitísimo profesorado comprometido coa tarefa de transmitir o galego ás novas xeracións. Agasallamos cunha camiseta de Lobishome a JUAN, o noso director, agradecéndolle o apoio continuo ao equipo de normalización durante estes catro anos.



Para finalizar este pequeno acto cantamos todos xuntos o himno galego ao son da música das nosas músicas de Tromentelo, Ana, María, Carla e Laura. E logo chegou a diversión cos Xogos Populares, organizados desde o Departamento de Educación Física.





14.5.12

GALEGO, TODO O QUE BUSCAS



Correlingua 2012

Un ano máis, a celebración do Correlingua reuniu todos os coles do Morrazo nos días previos ás Letras Galegas, para festexar que temos unha lingua propia. O noso alumnado dos equipos de normalización de 1º e 2º da ESO desempeñou un importante labor na organización dun evento que reuniu máis de 1000 nenos e nenas desde infantil a sexto de primaria. Foron os encargados dos obradoiros para os máis pequenos, mentres o resto do alumnado realizaba a marcha desde a Xunqueira ata o punto de reunión, na praza. Axudaron a rapaciños e rapaciñas a pintar os carteis con pintura de dedos, a bailar nos aros musicais e contáronlles contos dramatizados e representados con monicreques. Tamén axudaron a repartir leite na hora da merenda. Fixérono tan ben que recibiron parabéns de todos os coles participantes.

Tras repoñer forzas, chegou a hora do concerto de Pesdelán, cos cantos e danzas en directo do seu libro-CD Na punta do pé, un traballo publicado en Galicia e Portugal (Pezinhos de lã) pola editorial Kalandraka. Esta proposta didáctica, dirixida por Mercedes Prieto e Montse Rivera, anima a aprender cancións, bailes e xogos do patrimonio tradicional galego e portugués dun xeito divertido e participativo. Nenos e maiores gozamos bailando as danzas que foran preparadas previamente nos coles cos profes de música.






27.4.12

MÁIS GALEGO COS NENOS E NENAS





CONTANDO CONTOS NOS COLES DE CANGAS



Vinte e cinco alumnas e alumnos de 2º da ESO levaron aos nenos e nenas de infantil dos coles de Cangas unha chea de contos en galego. Mentres un narrador ou narrador ía lendo, os personaxes da Ratiña presumida, Croco, O lobo feroz ou A cebra Camila cobraron vida antes os ollos expectantes dos pequenos que foron un público marabilloso. Tamén gozaron cuns estupendos chivos chivóns deseñados polos propios contacontos que podedes ver nas fotos. Noutros contos – Cocorico, O galo traganoces ou A tartaruga- os protagonistas foron bonecos de peluxe habilmente manipulados desde detrás dun pequeno escenario construído por Bea, a profe de galego, a directora do proxecto. Tiveron un éxito rotundo e xa quedaron convidados e convidadas para o próximo curso.



Aquí tedes as fotos no cole da Rúa



  Estas son no cole de Nazaret



E estas en Coiro-Castrillón



12.4.12

VILAMOR. O CINE GALEGO DE IGNACIO VILAR

Hoxe recibimos no instituto uns invitados moi especiais: o director e os actores e a actriz protagonistas da película galega e en galego, Vilamor.



Ignacio Vilar, o seu director, explicounos o longo proceso de xestación dun filme ata que chega ás pantallas. Primeiro precisamos unha historia que contar que pode ser orixinal ou basearse ou inspirarse nunha obra escrita ou nun feito histórico. Este último é o caso de Vilamor, unha historia que parte dun comuna que existiu nas montañas de Lugo de 1976 a 1980. Por iso a elaboración do guión demorouse un ano e dous meses xa que antes de escribilo quixeron buscar todos os protagonistas reais daquela aventura e escoitar a súa experiencia. A partir de aí elaborouse a historia da película que ten como protagonista a Breixo, un rapaz dunha vila das montañas de Lugo, que se atopa con esta comuna na aldea abandonada de Vilamor. Seducido por esa idea dun estilo de vida alternativo, decide axudar aos que acaban de chegar a recuperar a aldea. Mais non todos parecen destinados a vivir este soño de liberdade e axiña xorden os problemas...
Cando se remata o guión, hai que conseguir financiamento. Contounos que o orzamento de Vilamor ascendeu a 1.700.000 euros, unha cantidade bastante elevada para o cinema galego aínda que moi pequena se a comparamos co americano. O 25% conséguese a través de axudas públicas da Xunta, do Estado e da comunidade europea. O 75% é o investimento que ten que facer produtora, neste caso Vía Láctea Fims, que leva o proxecto aos mercados internacionais que existen ao redor dos principais festivais de cine do mundo: o de Cannes en Francia; o de Venecia, en Italia; o de Berlín, en Alemaña; o de San Sebastián, en España; e o de Toronto, en Canadá. Vilamor vendeuse ben grazas a Pradolongo, a película anterior de Ignacio Vilar, un éxito sen precedentes dun filme galego nos mercados do mundo.
Comeza entón a rodaxe en escenarios naturais de Galicia na zona fronteiriza con Asturias: Negueira de Muñiz, Fonsagrada, Navia e os Ancares. Contáronnos as dificultades da gravación en exteriores de tan difícil acceso pero o resultado na gran pantalla fai que mereza a pena. O público en Lugo preguntaba onde se gravaran os escenarios das montañas nevadas e non podían crer que fose moi preto deles, no alto das montañas dos Ancares, a onde un director bastante tolo se arriscou a subir todo o equipo. Aquí tedes algunhas imaxes, propiedade intelectual de Vía Láctea Filmes, S.L



O seguinte paso é a montaxe e logo vén a posprodución na que se engade a música. Ignacio Vilar volveu confiar en Celtia Montes, que xa se encargara da música de Pradolongo, moi premiada en festivais de música de cine en EEUU. Viaxaron a Ucraína xa que gravaron cunha das orquestras sinfónicas de Kiev. Logo engadíronse instrumentos individuais, gravados en Bruar, na Coruña. Límpase o son dos diálogos, engádense os efectos especiais, calquera son que se escoite na película, e xa está lista para que os espectadores gocemos con ela nos cinemas. Leva xa tres semanas nas carteleiras de Lugo e Ourense e hoxe mesmo é a estrea en Vigo onde está en carteleira en Gran Vía, Praza elíptica e Multicines Norte.
Despois de ver uns vídeos promocionais falaron os actores. Para Xoel Yañez e Sabela Arán, Vilamor é a súa primeira experiencia na gran pantalla. Contáronnos algunhas das experiencias vividas na rodaxe dun xeito ameno e divertido. Rubén Riós, que traballa como actor desde hai 8 anos, falounos da súa experiencia extraordinaria ao lado de Ignacio Vilar no traballo de gravación e promoción de Pradolongo, que agora están tamén a iniciar con Vilamor onde el fai o papel de Breixo. Primeiro en Galiza, achegando a película á xente, nos institutos, nas asociacións de veciños, nos centros culturais, nos campos de fútbol... e logo a aventura polos festivais do mundo aos que levaron non só un filme senón novas da existencia dunha cultura e unha terra da que moitos nunca oíran falar. Estar na gran pantalla é existir como cultura e como lingua diferenciada. “Soñabamos cun mundo mellor. Decidimos facelo realidade.” Este é o lema da película e tamén un lema perfecto para a nosa cultura e lingua que grazas, primeiro a Pradolongo e agora a Vilamor, está presente nas pantallas de todo o mundo, un soño que parecía imposible e que Ignacio Vilar e os seus actores e actrices e Vía Láctea Films fixeron realidade.
Se queredes máis información procurádea na rede (vilamor.eu) onde poderedes ver vídeos promocionais e mesmo participar no concurso de vídeo TES QUE VELA e gañar unha fin de semana nos Ancares cos protagonistas e o director de Vilamor.

28.3.12

GARDIÁNS DO TESOURO

Nos últimos días do segundo trimestre, os equipos fomos convocados para unha misión moi especial: custodiar o prezado tesouro da nosa lingua desde Rodeira ata Santa Marta e de regreso ao instituto. Organizados en pequenos comandos tivemos que superar difíciles probas ao longo do camiño que puxeron a proba a nosa valía e déronnos as armas necesarias para superar con éxito a misión.

Nos Xardíns do Sinal, tivemos que superar a primeira proba. O sentido do humor, a retranca galega, foi sempre unha das armas que mellor protexeu o tesouro da nosa lingua. Por iso nesta proba localizamos cabaleiros e cabaleiras maiores, gardiáns do tesouro desde sempre, que andaban polo centro de Cangas. Escollemos como contrasinal o noso refrán: O PRIMEIRO DE ABRIL VAN OS BURROS ONDE NON DEBEN IR.

De Escritorio


Non foi nada difícil contactar. Foron moit@s @s que nos contaron historias de como se celebraba este día e as bromas que se gastaban e nós regalámoslles adhesivos dun burriño que levaba o refrán escrito. Logo reunímonos no dique e contámonos as bromas que nos contaran e outras que sabiamos nós. A risa converteuse nun escudo protector que nos permitiu avanzar ata Punta Balea.



En Punta Balea había outra proba que superar. A forza da natureza é outra das armas que protexen o tesouro da nosa lingua pois Galiza non podería ser sen lingua pero tampouco sen verde nin auga; a ecoloxía que é medioambiental e tamén lingüística. Por iso esta proba consistiu en encher o máis rápido posible cinco botellas pequenas da auga máxica da Dama da Lagoa. Só uns poucos cabaleiros ou cabaleiras podían entrar no territorio sagrado e só se podía coller e meter na botella un vasiño de cada vez. Fixemos cinco equipos á entrada do camiño da lagoa e fomos saíndo un de cada fileira para coller un vasiño de auga máxica coa que encher a nosa botella. Non foi tarefa fácil e esta proba axudounos a entender o problema medioambiental xerado na lagoa pola falta de chuvia.



En Areamilla esperábanos a última proba, a arma definitiva para a nosa misión, a conciencia da importancia do grupo. Porque para protexer o tesouro que levamos con nós e deixalo saír á rúa hai que ser fortes e non deixarse levar por eses inimigos que arrastran a un: o hábito, a moda, o que fan os demais...
Medimos as nosas forzas tirando da corda. Primeiro probou un só cabaleiro e foi arrastrado, e tamén dous e tres pero conforme o grupo medraba iamos tendo a forza necesaria para vencer. Tamén formamos rodas e conseguimos facelas andar moi, moi xuntiños e sentados uns nos xeonllos dos outros.



Xa estabamos listos para enfrontar a parte máis difícil do camiño. Os informes dos espías alertaban especialmente da existencia dun monstro ao que chaman PARECESDOMONTE que tiña feito estragos entre os cabaleiros e cabaleiras que se atreveran a sacar o noso tesouro á rúa. Antes era un dragón que botaba lume pola boca pero agora os seus métodos son máis sofisticados e instala un chip na cabeza da xente que fai que se sinta estraño e renuncie voluntariamente a ser portador do tesouro. Tamén contabamos con que o inimigo COSTUME tentase meterse entre as nosas filas, impedindo que puidésemos decidir por nós mesmos. Pero grazas á axuda dos asubíos máxicos dos gardiáns do tesouro, os cabaleiros e cabaleiras que foron atacados puideron recuperar as forzas de inmediato.

Ao chegar a Santa Marta estabamos felices e gozamos xunt@s do noso tesouro nun fermoso día de sol. As torres humanas demostráronos unha vez máis a importancia do traballo en equipo. É tal a forza da unión e da confianza que depositamos no equipo que permitiu que os cabaleiros e cabaleiras que quixeron voasen polos aires.



O éxito desta misión debe animarnos a asumir novos retos máis difíciles aínda para garantir a supervivencia deste tesouro noso tan especial que é a nosa lingua propia.

8.3.12

MÁIS GALEGO NA LOITA CONTRA CALQUERA TIPO DE DISCRIMINACIÓN

Como cada ano o equipo de dinamización da lingua galega preparouse para a celebración do DÍA DA MULLER, o 8 de marzo. No noso traballo diario pola superación de prexuízos, muller e lingua galega únense ao longo do mes de marzo. Ambas foron recluídas durante séculos no ámbito do fogar e, aínda que se avanzou no camiño de loita pola igualdade de dereitos, é moito o que queda aínda por facer.

Escollemos para a EXPOSICIÓN un fermoso calendario que dedica cada día do ano a un feito significativo ou a unha muller destacada na loita pola igualdade e invitamos a todo o alumnado do centro a buscar información sobre o dato que aparecía o día do seu aniversario. Os mellores traballos serán publicados na revista Abre os ollos. Desde a bilioteca seleccionaron libros escritos ou protagonizados por mulleres para acompañar a nosa exposición.



O alumnado de 4º da ESO competiu na nosa XINCANA DE TAREFAS DOMÉSTICAS. Grupos de rapaces e rapazas realizaron de xeito compartido as tarefas habituais do fogar falando en galego, tentando demostrar a si mesmos e aos demais que os prexuízos son cousa do pasado.

1ª PROBA: arranxamos o noso cuarto (aspirar, facer a cama, limpar o po)



2ª PROBA: cosemos un botón



3ª PROBA: organizamos a roupa da casa (tender, pasar o ferro, dobrar e gardar)



4ª PROBA: preparamos unha torta de chocolate.



5ª PROBA: colocamos un colgadoiro utilizando un trade e un desaparafusador



6ª PROBA: confeccionamos unha lista da compra con artigos de alimentación, aseo, limpeza, mantemento e papelaría.

De 7.- compra


Houbo premios para os equipos que realizaron mellor as probas, compartindo o traballo entre todos e todas e falando en galego.

A COMPETENCIA ORAL EN GALEGO

O Consello da Cultura Galega invitounos a presentar nunhas Xornadas celebradas en Santiago as liñas xenéricas do proxecto de normalización e dinamización do galego do noso instituto. Aceptamos encantados e quixemos que fósedes vós, os alumnos e alumnas a quen está dirixido, a través deste vídeo, os que contásedes como é o noso xeito de traballar e como practicades para ir aumentando e mellorando o uso do galego.


A competencia oral en galego no IES de Rodeira from lingualiza on Vimeo.

17.2.12

MÁIS GALEGO CELEBRANDO O ENTROIDO

Nada faltou no noso Entroido deste ano coas comparsas e 2º de bacharelato como grandes triunfadoras. KOSTIA, o barco cheo de guiris de 2º de Bacharelato A, con buraco na proa, monxas que tolean e o capitán Schettino que foxe cunha loura; con 2º Bach C-D chegou nada menos que a familia real e o goberno en pleno e moitos indignados e indignadas que pedían revolución; e 2º B, farto de tanto estudar, decidiron converterse en hobbits e marchar para a comarca do señor dos aneis. Pero iso non foi todo, que tamén houbo comparsas na ESO: Brancaneves chegou cun montón de ananos de 3º ESO C a ritmo de ai vou! E tamén os de 2º que preferiron un ritmo máis rockeiro... pero todos chegaron cargadiños de coplas criticando aos profes, como manda a tradición. Moitos máis disfraces individuais e de grupo animaron a festa. Podedes velos todos nas fotos.

14.2.12

MÁIS GALEGO PORQUE NOS QUEREMOS

Que mellor data que o 14 de febreiro para que a nosa lingua fale de amor? Creatividade e imaxinación deron vida aos versos dos nosos poetas nos murais de aula e nas postais de amor.




A planta baixa encheuse de corazóns vermellos con dedicatorias para as fotos que fixemos coa xente a que quixemos dicirlle o especial que é para nós en galego, unha lingua especial que nos fai únicos no mundo.




Non deixes de visitar as librarías de Cangas este San Valentín. Repartirán as nosas postais de amor en galego a todos os clientes e clientas.


3.2.12

MÁIS GALEGO NA CIENCIA E NA TECNOLOXÍA

Uns profes moi novos vestidos con batas brancas invitáronnos a gozar da ciencia e da tecnoloxía en galego nesta nova edición da Semana da Ciencia.


30.1.12

DÍA DA PAZ

O 30 de xaneiro no 2º recreo convocounos o desexo de sumarnos a cantos traballan a favor da PAZ e da NON VIOLENCIA. E escollemos facelo simbolizando o mundo con dúas grandes rodas, unha por fóra mirando cara a dentro e outra por dentro mirando cara a fóra, que xiraban mentres soaba a música de No mundo de LUAR NA LUBRE.

No mundo hai tres cousas
que me poñen mal:
as guerras, a fame e a desigualdá(de)
Non sexas pasivo e móvete xa
Aínda hai esperanza,
debemos loitar

Coas guerras fracasa a humanidá(de)
é unha constante de volta para atrás
morte, enfermidade e desolación
levántate, móvete e deixa o sillón.

Da fame, queridos, que vos vou decir,
milleiros de nenos non ten que comer
en Asia, América ou en África
polo ben do mundo, solidariedá(de)
(bis)


Nese mundo simbolizado nas rodas, cada un de nós representaba unha das linguas e culturas do mundo.que foran previamente repartidas. Cada participante a levaba escrita nun cartel xunto coa palabra PAZ tal e como soa en cada unha das linguas. Porque o mundo é diverso en culturas, linguas, razas, maneiras de pensar, de opinar, de manifestarse... e a paz só será posible no respecto e na igualdade en dereitos e oportunidades. Por iso, cada vez que a música paraba, celebramos o noso desexo de paz achegándonos ás culturas que quedaban fronte a nós, saudándoas dicindo PAZ na súa lingua e fundíndonos nunha aperta cariñosa que simbolizaba o noso desexo de acollida. NON á imposición. SI ao encontro e ao diálogo. Só así atoparemos camiños para a PAZ.

Defendemos o dereito de cada pobo a vivir na súa terra e a manter a súa identidade cultural desde o respecto aos dereitos humanos. Porque a diversidade nos enriquece.

Na construción da paz todos somos necesarios, todos temos responsabilidade. Para simbolizalo colocámonos uns xunto aos outros, unha culturas ao lado da outra, e debuxamos cos nosos corpos o símbolo da paz.

Quixemos rematar este acto festivo cunha lembranza aos pobos que, neste mesmo momento, están sufrindo guerras que só favorecen os intereses duns poucos. Pobos asolados por bombas que caen do ceo. Oxalá a humanidade entenda que nada dá dereito a arrasar pobos e vidas. E os nosos soños e desexos de paz e felicidade convertéronse nunha chuvia de caramelos.

13.1.12

MÁIS GALEGO ACHEGÁNDONOS AO PORTUGUÉS

Un ano máis descubrimos o ben que nos entendemos cos portugueses falando galego. Foi nunha visita ao Porto. Alí conversamos co Fabio, o guía que nos mostrou as adegas do afamado viño do Porto e nos explicou en portugués como se elaboraba. Era moi simpático e entendémolo perfectamente. No tempo libre buscamos onde comer, paseamos polo casco vello de Porto e pola zona comercial. É realmente unha gran cidade. A última visita foi ao museo de arte contemporánea de Serralves. Alí os guías tamén nos falaron en portugués e aínda houbo tempo para dar un paseo polos fermosos xardíns. Un día moi ben aproveitado…