ATRÉVETE A CANTAR EN GALEGO

Hoxe, o alumnado que formamos parte do EDLG, celebramos unha festa en galego. Primeiro marcámonos como nas discotecas cun selo de corazón que levaba escrito “Quérote” e que funcionaba como entrada. Comezamos coa proxección das fotos e vídeos de todas as actividades que levamos feitas e logo chegou o momento máis esperado: a estrea de vídeos musicais gravados polos equipos para cantar e bailar. O equipo de 1º e 2º da ESO escolleu Medomedá, un tema do álbum de María Fumaça para o que, ademais de bailar, se disfrazaron de todos os personaxes das historia da nosa tradición de terror.  

O de 3º e 4º escollemos Alcolitos, versión galega de Páramo Pictures de Despacito, que ofrece un interesante debate entre a defensa do noso monte tradicional e a plantación de eucaliptos para conseguir cartos rápido sen ter en conta o dano medioambiental. 

O alumnado de Bacharelato escolleu Terra de Dakídarría.

 

O profesorado do EDLG, que tamén participou como cada ano, gravou un vídeo de humor sobre o tema Quero morrer en Jalisia de Monoulious DOP. 

Tras cada proxección, o grupo saíu cantar o seu tema, acompañado polo público nos retrousos.

Tamén cantamos vídeos gravados outros anos polo alumnado de 2º de Bacharelato que xa marcha do instituto como Fai sol de Terbutalina 

ou Quero ver como te ris de Medomedá. 

A festa rematou cunha comida compartida.

ATRÉVETE CO GALEGO NA EMPRESA

O traballo de investigación realizado polo alumnado de ciclos formou tamén parte da decoración navideña, atando, con lazos prateados nunha gran rede azul en forma de árbore de Nadal, carteis informativos e etiquetas e produtos etiquetados en galego, menús de restaurantes, camisetas, cuncas, fundas para móbiles e táblets, publicidade… invitando a consumir produtos aos que o uso do galego  lle engade un selo de orixinalidade e distinción.

ATRÉVETE A LER EN GALEGO

Para que as novidades de libros, audiovisual e música en galego chegasen ás casas, editamos, de xeito conxunto cos outros EDLG do Morrazo, un tríptico con suxestións para toda a familia e recomendación por idades:

- Para educación infantil 

- Para educación primaria 

- Para educación secundaria 

ATRÉVETE CO GALEGO NA CELEBRACIÓN DO NADAL

Chega o Nadal e desde os equipos procuramos unha maneira orixinal de decorar o centro, facendo do galego o elemento central. Escollemos as cores azul e prata e eliximos como elemento central da planta baixa unha orixinal ÁRBORE DE NADAL, feita cun anaco de mar en diferentes azuis cortado en forma de triángulo rematado nunha onda e adornada cos peixes de papiroflexia feitos polo alumnado para celebrar o Día da Ciencia en galego. Quedou xenial!

Arredor da árbore organizamos POSTOS DE FEIRA, tamén decorados e azul e prata nos que se ofreceron suxestións para agasallar en galego. Expuxéronse as novidades de narrativa, ensaio, poesía, banda deseñada, música e audiovisual que nos ofreceron as editoriais galegas. Visitamos o Culturgal e trouxemos novidades para dar a coñecer á comunidade educativa xunto con pósters, chapas, cartas en galego para os Reis Magos… Tamén nos puxemos en contacto con Xerais, Galaxia e Consorcio Editorial que nos deixaron novidades en depósito para dalas a coñecer a toda a comunidade educativa.

O alumnado puido baixar á exposición e propoñer o que máis lle gustaba para ter na biblioteca do centro cuxo coordinadora atendeu, encantada, as súas propostas.

ATRÉVETE. TOLERANCIA CERO CONTRA O MACHISMO

Vestimos de negro o IES de Rodeira para chorar as asasinatos e o sufrimento causado pola violencia machista e convertemos o noso compromiso pola superación dos estereotipos e a favor da igualdade plena de homes e mulleres en bolboretas brancas. Así, vestidos de negro e coas bolboretas brancas prendidas na roupa formamos unha cadea humana ata a Praza das Pontes onde o alumnado de 2º Bacharelato deu lectura a un manifesto contra a violencia e a favor da igualdade. Ao regreso ao centro, na tea negra que levaba unha semana poñendo de loito o valado exterior e escapando dunha mancha vermella que simbolizaba a violencia , deixamos as nosas bolboretas prendidas para dar testemuña de que  é posible a esperanza se nos atrevemos a romper coas relacións tóxicas e construír un mundo onde o amor nos faga libres e iguais.

NOVA GARDA: A relixión do mar

Vémonos o sábado, na Fonte do Galo, ás 20h.

ATRÉVETE A CONSERVAR AS NOSAS TRADICIÓNS

Este ano por fin San Martiño chegou co seu verán e tivemos un día espléndido para celebrar o magosto. Unha enchenta de castañas asadas e moitas ganas de cantar e bailar ao son da nosa música máis tradicional.

magosto from lingualiza on Vimeo.

ATRÉVETE A FACER AMIG@S EN GALEGO

Por fin chegou o día de coñecer en persoa aos amigos e amigas da Estrada. Contactamos con eles o curso pasado por carta e logo mantivemos contacto a través das redes sociais. E hoxe por fin collemos un bus para ilos visitar ao seu instituto. Pasamos a mañá polo centro da Estrada, coñecendo os lugares nos que soen divertirse. Logo volvemos ao instituto para facer unha comida compartida na biblioteca. Rematamos o encontro cun xogo de pistas nunha carballeira próxima. Foi un día inesquecible. Xa esperamos impacientes que nos devolvan a visita en abril.

 

DOMINGO FONTÁN NO DÍA DA CIENCIA EN GALEGO

Para celebrar o Día da Ciencia en galego o alumnado de Bacharelato investigamos a figura de Domingo e expuxemos a información que atopamos na entrada do instituto.

 

Domingo Fontán, from lingualiza

Alí colocamos tamén unha reprodución do seu mapa feita por Marcos e Iria, dous topógrafos, exalumnos de Rodeira. A súa charla foi moi interesante. Quedamos impresionados co traballo de Domingo Fontán e o adiantado que foi para o seu tempo. Admira ver canto conseguiu aproximarse aos mapas que temos hoxe sen contar con toda a tecnoloxía que temos hoxe! Tamén conversamos con Marcos e Iria sobre a carreira de Topografía, unha especialidade de Enxeñaría que eles estudaron en Lugo, e dos seus proxectos na empresa que montaron en Cangas que se chama METRA, agora xa empregando as novas tecnoloxías.

ATRÉVETE COA FÍSICA EN GALEGO

Con motivo do Dia da Ciencia en Galego, alumnado voluntario explicou leccións de física, matemáticas e tecnoloxía en galego para os seus compañeiros e compañeiras de Bacharelato. Aquí tedes a Manel explicándonos por que voan os avións.

POR QUE OS AVIÓNS VOAN from lingualiza on Vimeo.

ATRÉVETE A NADAR CONTRA CORRENTE: CIENCIA E TECNOLOXÍA EN GALEGO

O alumnado da ESO celebramos o Día da ciencia en galego cun gran mural colectivo para reivindicar o ensino da ciencia e da tecnoloxía en galego. Atrevémonos a nadar contra corrente defendendo que, como estudantes, temos tamén o dereito a gozar en galego das matemáticas, a física e química ou a tecnoloxía. E fixémolo con peixes de papiroflexia sobre un fermoso fondo mariño. Aquí tendes fotos do evento e as instrucións para a realización do peixe.

SAMAIN NAS AULAS

UNHA INSTALACIÓN TERRORÍFICA

Que mellor inspiración que a convocatoria dun concurso creativo terrorífico para animarse a montar unha instalación artística! Fomos o alumnado de 2º de Bacharelato de Arte e  Debuxo artístico quen a montamos e organizamos visitas guiadas nas que explicamos os elementos terroríficos que conformaron unha instalación inspirada na pintura, nos relevos e no cine cunha presenza destacada das novas tecnoloxías. Foi unha experiencia moi enriquecedora!


instalación terrorífica from lingualiza on Vimeo.

SAMAÍN NA BIBLIOTECA

A Biblioteca uniuse á celebración do Samaín nunha sesión de historias e contos ao que estivo invitada toda a comunidade educativa.

HARRY POTTER ENFRÓNTASE A ARAGOG EN STOP MOTION

1ºESO C conseguimos un dos premio do concurso creativo realizando un fermoso mural como escenario dun fragmento de Harry Potter e a cámara dos segredos. Sobre el fomos desprazando os bonecos de Harry, Ron e o can Fang que seguen ás arañas ata a Fraga Prohibida. Alí son atacados por arañas xigantes que os levan xunto ao seu xefe Aragog. Cando están a piques de seren devorados, aparece o automóbil do señor Wesley no que foxen a toda velocidade. Fotografamos cada escena e montamos un divertido stop motion.

AS ARAÑAS ASASINAS

Outro dos escenarios premiados preséntanos unha vítima do veleno mortífero das arañas. Coa axuda das profes de Bioloxía buscamos información e fotos das arañas máis velenosas do mundo.

 

Arañas e velenos from lingualiza

Tamén estudamos na aula as características das arañas. Chamounos especialmente a atención a cantidade de ollos que teñen. E tamén a resistencia dos fíos que tecen e os usos que se lle dan na actualidade en cirurxía e nos traxes blindados. Moitas características das arañas aparecen nos superherois da banda deseñada.

As arañas na banda deseñada from lingualiza

Tamén formaron parte da exposición as carátulas do cine protagonizado por arañas.

 

Arañas no cinema from lingualiza

ELARAÑA NA PLANTA BAIXA

A araña que atacara a Frodo e a Sam en O señor dos aneis acaba de instalarse nunha tremenda arañeira na planta baixa do noso instituto. 

Só precisamos unhas bolsas de lixo, uns tubos de recubrir tuberías e un pouco de arame para dar vida a Elaraña que xa foi de caza e ten un prisioneiro a secar nas súas redes. 
Xunto a este escenario, o primeiro premio do concurso creativo, colocamos o fragmento da tradución ao galego desta obra e información sobre o seu autor.

Pero este non é o único texto literario que nos fala das arañas. Pescudamos e atopamos moitos fragmentos que encheron de literatura os taboleiros dos corredores.

 

Arañas na literatura from lingualiza

AS ARAÑAS INVADEN O INSTITUTO DE RODEIRA

Somos unha raza con sorte vivindo en condicións case ideais. Non nos molestan hordas de animais salvaxes e sanguinarios. Aos animais que conviven con nós só lles falta unha calidade para facernos tremer co medo: o tamaño...

Imaxinemos por un momento que as arañas que habitan os xardíns do instituto de Rodeira sufrisen unha mutación que aumentase cincuenta veces o seu tamaño, vinte ou trinta metros de diámetro. Que suban polas paredes exteriores e invadan as aulas sorprendendo o alumnado e sementando o terror...

Cuns paraugas vellos e un pouco de imaxinación este foi o escenario que recreamos desde o EDLG para invitar a toda a comunidade educativa a celebrar o Samaín cun concurso creativo. 

arañas con paraugas from lingualiza on Vimeo.

ATRÉVETE A LER EN GALEGO

Hoxe celebramos o Día das Bibliotecas Escolares. Nós colaboramos coa proposta da Biblioteca, desde a campaña RECOMÉNDOCHO, animando a todos e a todas a ler en galego pintando as portadas dos nosos libros favoritos.