O EQUIPO DE MEDIACIÓN VISITA RIBADAVIA

Ben mereciamos o equipo de mediación do instituto una recompensa polos nosos desvelos para mellorar a convivencia do instituto. Metemos na mochila toalla e traxe de baño, a pesar de estarmos xa en outubro, porque nos fomos bañar ás termas de Prexigueiro. Logo tivemos unha visita guiada polo casco histórico de Ribadavia e rematamos o día na zona fluvial de Veronza.

DÍA EUROPEO DAS LINGUAS

Así quedou o noso mapa europeo da diversidade e o noso mural de agradecemento a cantos traballan por manter viva a diversidade do mundo. E o test foi todo un éxito de participación. Se aínda non fuches facelo, esperámoste a semana que vén.

CANTO SABES DAS LINGUAS EUROPEAS?

O 26 de setembro celebramos o Día Europeo das Linguas. E non hai mellor xeito de celebralo que aprender cousas novas sobre a diversidade lingüística que nos caracteriza porque todos os europeos e europeas vivimos rodeados de moitas linguas que debemos protexer porque son o noso maior patrimonio cultural. Non deixes de pasar polo corredor do 1º andar para comprobar canto sabes das linguas de Europa contestando a un test que preparamos o alumnado de 2º da ESO. Por cada dez respostas acertadas conseguirás unha lingua doce para celebrar que ti tamén valoras a riqueza da diversidade lingüística e cultural. Deixámosche aquí o test para que practiques…

 Tamén haberá linguas doces mañá, venres 25, na celebración do Día Europeo das Linguas nos dous recreos. Ven participar sacando unha lingua do globo terráqueo e colocándoa no mapa de Europa.

 

UNHA CHAVE QUE NOS COMPROMETE

Xa tivemos a primeira reunión por nivel dos equipos formados con alumnado voluntario. Recibimos unha chave coa que fixemos un colgante, decorándoa ao noso gusto con esmalte de unllas, papel e tea de cores. Quedaron moi orixinais! Levámolo con nós para que nos lembre todo o curso o noso compromiso de sacar o galego que levamos dentro e abrir con el novas portas de comunicación no instituto, na casa, en Cangas e no mundo.

CONSTRUÍNDO UN CORAZÓN PARA QUERER FALAR EN GALEGO

Non hai mellor acto de amor a unha lingua que falala. Un pode pensar que o que fai non é importante, pero cada alumno ou alumna, cada profesor ou profesora, cada membro do persoal non docente, cada pai ou nai… cada membro da comunidade educativa, cada persoa de Cangas, cada galego ou galega, cada estranxeiro que a aprende… cada un de nós somos a peza dun quebracabezas co noso nome escrito que non ten sentido se permanece soa pero que encaixa cando se une ás pezas dos demais e vai tomando a forma dun gran corazón que simboliza un compromiso xa non individual senón comunitario: o EU transfórmase en NÓS e as forzas multiplícanse na defensa do noso maior patrimonio: a nosa lingua. Así o fixemos na 1ª reunión do equipo: todos e todas fomos pezas que encaixaron para formar o noso corazón de equipo, o centro do lema que permanecerá nun gran cartel todo o curso á entrada do centro. Lembrade que a semana que vén comezamos xa coas reunións por equipos no 2º recreo de cada día da semana. Tedes os carteis polos taboleiros. Nos esquezades o voso día!

 

VÉMONOS O MÉRCORES!

Así quedaron os carteis dos taboleiros cos corazóns de todos e todas os que nos anotamos ao equipo para falar en galego. Escollemos un adhesivo co noso argumento preferido para poñer ben á vista e recordar así o noso compromiso de falar galego nas reunións e ilo incorporando pouco a pouco á nosa vida. O mércores 28 temos todos e todas a primeira reunión no 2º recreo. Non faltedes!

 

NOVO CURSO. NOVA CAMPAÑA

Comeza un novo curso  e con el unha nova campaña do EDLG que xa está a animar desde os corredores do instituto e tamén desde aquí, desde o noso blog, a romper co medo e coa indecisión e a botarte a falar en galego. Apúntate ao equipo e axúdanos a ancher de corazóns o lema deste curso!

 

NOVO CURSO. NOVOS PROXECTOS.

De blog16