Moitos o coñecemos por un dicionario galego-castelán de pastas vermellas que comezou a circular nos tempos da ditadura. Nacido en Tomiño en 1936, Xosé Luís Franco Grande recolleu nel máis de 40.000 palabras nunha obra que formou parte da educación de moitxs escritorxs e lectorxs que aínda seguiamos consultando as súas páxinas cando non atopabamos as palabras de noso nos dicionarios normativos.
Tamén destacou a súa obra literaria nos tempos da resistencia, nos que se sumaría á fundación na clandestinidade do PSC. Vieiro Choído como dramaturgo en 1957, Entre o si e o non como poeta en 1967, como ensaísta Os anos escuros. A resistencia cultural dunha xeración, en 1985.
O noso recoñecemento ao poeta, ao memorialista, ao recolector de palabras, ao loitador pola democracia que nos vén de deixar hoxe.
Malia a estado de alarma, o Enreguéifate botou a andar este ano
para animar a pequenos/as e maiores a pasar o tempo agudizando o enxeño a
través da arte da regueifa.
Enreguéifate é un proxecto impulsado polos concellos de Ames,
Pontevedra, Rianxo, Santiago de Compostela e Teo que apoia a difusión
da improvisación oral en verso (regueifa) para contribuír, por medio
dela, á promoción do uso da lingua galega. Aínda que houbo que renunciar aos obradoiros, mantense o concurso de vídeos regueifando. Está aberto o prazo ata o 29 de maio. Anímate!
Queredes ler pero non tedes libros na casa? A Xunta de Galicia vén de solucionar o problema poñendo en aberto a plataforma de préstamo de obras en formato electrónico das
bibliotecas públicas galegas: GaliciaLe. Así poderedes descargar en ordenadores, tablets ou móbiles obras en formato dixital máis de 4.500 títulos, dos
que a maioría están en galego e en castelán, pero tamén os hai en inglés,
portugués, francés, italiano, catalán e éuscaro, libros infantís, xuvenís e
para adultos. Ademais suma 31 revistas e 300 audiovisuais feitos en Galicia que
comprenden longametraxes, curtas ou documentais.
Para facilitar o acceso a esta plataforma só é necesario
rexistrarse mediante o formulario dispoñible na páxina web de GaliciaLe. Tras
cubrir o formulario, o usuario recibirá no seu enderezo electrónico as claves
para acceder a plataforma. Cando remate o estado de alarma, os usuarios
disporán dun período de 30 días para e recoller o seu carné e seguir gozando
das vantaxes da rede de bibliotecas públicas de Galicia e desta plataforma.
Como complemento a esta iniciativa, os arquivos xestionados
pola Xunta (Arquivo de Galicia; e históricos, do Reino de Galicia, Lugo,
Ourense e Pontevedra) propoñen una viaxe polo tempo dentro da nosa Comunidade.
Entre os diferentes recursos destacan exposicións virtuais en 3D e percorridos
360º ou as mostras do Arquivo do Reino, a última das cales foi publicado o
pasado 8 de marzo, co gallo do Día internacional da Muller, e que leva por
título Meigas, feitizos das menciñeiras: procesos xudiciais por bruxería.
Ademais, e aínda que os museos xestionados pola Xunta non
están abertos, podemos explorar as súas coleccións e as actividades que se
realizan neles ao través do mundo dixital. Na maioría deles pódese facer un
percorrido completo polas súas salas expositivas e contemplar as obras expostas
como se se estivera no interior, con información complementaria.
Tres boas opcións de visitas virtuais para comezar, por ser
centros estar afastados das cidades e a súa interesante proposta museográfica,
son o Museo do Castro de Viladonga e ao propio Castro, o Massó e as Pallozas e
conxunto etnográfico do Cebreiro. Ademais, pode facerse unha visita virtual
polos espazos de todos os museos xestionados pola Xunta.
O Departamento de Informática do noso instituto, ante as dificultades de conseguir material de protección para os sanitarios, puxo a funcionar as impresoras 3D e está a fabricar unhas 40 pantallas diarias que xa están empregando no Centro de Saúde de Cangas. Parabéns polo voso traballo!!!
Xa que non podemos celebralo no instituto, terémonos que conformar con facelo desde as nosas casas.
Para que non poida ver as árbores desde as súas ventás, aquí vos deixo un vídeo, que active a forza da imaxinación porque esa si que non sabe de confinamentos.
Pandemia? Si, mais de contos! Esa é a proposta virtual que
desde o colectivo NOGA, Narración Oral Galega, botaron a andar para vivir en
positivo estes días de illamento.
Aquí tedes o primeiro pero prometen un por día na súa canle
así que atentos!!!
Aínda pechados notamos que os días medran e hoxe celebramos o comezo da primavera. Boa ocasión para retomar o noso contacto co portugués con este fermoso vídeo no que escoitamos un poema de Irene Vella na voz de Rui Unas.
O talento galego non deixa de poñerse ao servizo de cantos estamos recluídos na casa. E a música non ía ser menos. O festival Son da Casa convídanos no torreiro do noso Instagram mañá venres e o sábado 21.
Aulas galegas é un
portal educativo realizado por un colectivo de profesoras e profesores sen
ánimo de lucro que cremos que ante a situación de illamento provocada polo
coronavirus Covid-19 debemos ofrecerlle unha axuda educativa á sociedade.
Aulas galegas nace
para axudar o alumnado, as familias e o resto de profesorado a atopar recursos
e materiais educativos en galego.
A vocación deste portal educativo non é substituír as
indicacións educativas que o profesorado lle faga ao seu alumnado no ensino
regrado nin o papel das administracións educativas.
A nosa intención é ser unha fonte de recursos que sume no
panorama educativo galego.
Para o alumnado e as súas familias publicaremos cada día
material clasificado por nivel académico e materia para as etapas de Educación
Infantil, Primaria, Secundaria e Bacharelato. Compartiremos contidos educativos
de elaboración propia feitos especificamente para esta iniciativa e tamén
outros que xa existen e que paga a pena divulgar.
Para o profesorado imos crear unha sección organizada por
departamentos didácticos onde se poidan atopar páxinas doutro profesorado
galego desas materias.
Non todo van ser malas novas con esta pandemia que nos ten recluídos na casa. Toca activar a nosa creatividade e aproveitar oportunidades como esta que nos ofrece Novo Cinema Galego. Xa que non podemos saír ao cine esta fin de semana ofrécennos en aberto, desde a súa páxina web un ciclo de 16 filmes, seis deles longametraxes, entre os que destacan Vikingland (Xurxo Chirro, 2011), O Quinto Evanxeo de Gaspar Hauser (Alberto Gracia, 2013)ou Todos vós sodes capitáns (Óliver Laxe, 2010).
E Kalandraka ten en marcha na súa web a sección Contos contados que estrea Xosé Ballesteros, quen nos relata O coelliño
branco, unha adaptación a partir do conto popular portugués con ilustracións de
Óscar Villán.
Aquí tendes os actos organizados polo Concello na celebración do Día da muller. Xa comezamos o venres. Vémonos no Auditorio ás 21:15 para a presentación do novo traballo de Tanxugueiras, Contrapunto. Non faltedes que vale moito a pena!!!
Ese foi o reto para os departamentos na celebración do Día da Muller: encher os corredores do centro e as rúas de Cangas coas mulleres, de todas as épocas históricas e de todos os ámbitos científicos e culturais, que derrubaron as fronteiras que as limitaban e abriron paso aos dereitos dos que gozamos hoxe. Todas elas van tecendo unha rede de cores á que todas e todos estamos invitadas a unirnos, a da IGUALDADE.
O alumnado de Animación Socioeducativa reflexionou sobre cales son esas fronteiras que aínda hai que derrubar para conseguir a igualdade e convertéronas en pedras dun muro que invita a reflexionar a toda a comunidade educativa.