5.4.17

PERSEGUINDO A CHAVE DO GALEGO

O Equipo de Dinamización enfrontouse ao reto de pasar un día de lecer en galego. Tivemos que superar diferentes probas para gañarmos chaves coas que abrir as portas que mantiñan pechadas os prexuízos e ir así gañando soltura e liberdade no uso cotián da nosa lingua.

A primeira proba foi falar coa xente no centro de Cangas.  Preguntámoslles se pensaban que Cangas era un pobo aberto ou había moitos prexuízos, concretando no respecto cara a colectivos como os inmigrantes, os homosexuais, a xente estravagante con gustos diferentes á maioría, as clases marxinais... Logo sentamos no dique a comentar as respostas. Houbo chave para todos e todas as que falamos.



A segunda proba fixémola en Massó. Tivemos que demostrar o coñecemento da nosa lingua. Cada grupo preparou definicións e os outros grupos tiveron que adiviñar a palabra á que se referían, conseguindo unha chave por cada acerto.



A terceira proba foi en Area Milla. Tocaba rirse de nós mesmos e imitar o confesionario de "Gran hermano" reproducindo os díxome díxome que impiden que empreguemos a lingua libremente. Esta foi a proba máis difícil e non moitos se atreveron.




A cuarta proba é xa un clásico. No túnel que inicia o camiño máis estreito a Santa Marta, aproveitando o eco, tiñamos que cantar moi forte en galego para facer fuxir as pantasmas dos prexuízos e poder cruzalo. Ao saír, vingámonos dos profes e fixémolos cantar tamén a eles... Hai que recoñecer que non o fixeron mal de todo...



O día foi moi fermoso  e permitiunos gozar da praia, do volei, das cartas, da conversa... orgullos@s de ser quen de manternos falando galego para non perder as chaves conseguidas que, cando regresamos, puidemos trocar por chocolate. Foi un día xenial!












No comments:

Post a Comment

e ti que dis?