CERTAME BO VOO

Cales son os límites da sustentación aerodinámica non motorizada? Que parámetros de navegación pode superar un aparello voante en soporte celulósico? Dende hai séculos, milleiros de escolares enfróntanse a estes interrogantes, incluso en horas lectivas. Incontables avións de papel sucan todos os días os espazos aéreos académicos. Mais non é posible acadar a excelencia con experiencias illadas. A superación esixe unha competición aberta e sistemática. Un desafío: BO VOO

Aproveitando a fin do trimestre, o alumnado de 1º BACH A organizamos o  CERTAME BO VOO no que se enfrontaron catorce equipos con avións de papel nas modalidades de distancia, acrobacia, precisión e planeo. Dispuxemos todo o material en galego (carteis, inscricións...) e foi tamén a lingua dos presentadores e anotadores de resultados. Os avións debían ser realizados in situ e postos a proba baixo a atenta mirada de público e xurado. O alto nivel dos trofeos facía a competencia, se cabe, mais apaixonada. A maña soleada e con lixeira brisa animaba á participación.

O primeiro impacto produciuse na proba de distancia, cando WHITE ARROW (1ºBACH) acadou un récord de 44 metros nun lanzamento imparable que pulverizou as marcas anteriores. Volveu impoñerse na seguinte proba, cun 80% de precisión. Foi alcanzado na proba de planeo por VIN POLO VENTO (3º ESO), quen mantivo o seu aparello no ar máis de 15 segundos. FLYING CREW (3º ESO) conseguiu o trofeo en acrobacia. E AGAPORNIS (1º ESO) entrou 3º na xeral tras rozar os primeiros postos nas sucesivas mangas.

Ao rematar entendemos que non era a fin, senón o comezo. Os límites da aeronáutica poden ser ultrapasados. Hai moito que investigar, probar, adestrar. Xa estamos preparando o seguinte certame.