É unha boa nova que gañase o 62º
Festival da Canción de Eurovisión unha canción en portugués representando a
Portugal. Así o decidiron tanto o xurado como o público, desmentindo aquilo de
que para gañar hai que cantar en inglés. Non deixa de chamar a atención que nun
festival que escolleu como lema “Celebra a diversidade” a maioría dos países
renuncien á súa lingua, o maior signo de identidade cultural, para cantar en
inglés. Non o fixo Portugal nin tampouco Italia, outro dos temas favoritos. Non
se trata de pecharnos no noso, ao contrario, manter a diversidade lingüística
esperta o desexo por coñecer outras linguas. Na entrevista cos presentadores de
Kiev escoitamos a Salvador Sobral, o cantante portugués, falar con fluidez en
inglés. Trátase de ser auténtico: a música, dixo, non son fogos artificiais, é
sentimento. Renunciou ao exceso de escenarios, luz e cores para centrarse na
interpretación, na voz e na lingua. E conseguiu comunicar cun público de
diferentes linguas desde o convencemento de que era unha boa canción e era en
portugués. E compartiu o éxito, cantando coa súa irmá, a compositora, tras
recibir o micrófono de cristal. Foi un éxito para Portugal e tamén para a
Europa da diversidade. A que nos gusta.
No comments:
Post a Comment
e ti que dis?