Un divertido paso adiante na defensa da nosa cultura: FESTA NO NADAL CANTANDO E BAILANDO EN GALEGO.

Que mellor xeito de rematar o trimestre que cunha festa para todo o alumnado dos equipos! Había que presentar invitación para poder entrar, un anaco de cartolina branca ou azul coa que formando entre todos e todas unha nova árbore de Nadal. Ao entrarmos, puxemos un adhesivo de CONVERSA EN GALEGO para nos identificar se saïamos e queriamos volver entrar. Pasámolo xenial! Nas últimas reunións escolleramos un tema de música en galego que nos gustaba e fixeramos un videoclip. Estabamos desexando a súa estrea e ver os videoclips do resto dos equipos. Sentamos no chan moi nervios@s. Primeiro puidémonos ver nas fotos de todas as actividades realizadas no trimestre. E logo chegou a hora da verdade: repartimos tarxetas coas letras  e presentamos os grupos escollidos e logo... o videoclip e a cantar e bailar ao ritmo de música en galego máis actual. Todos estiveron moi ben aínda que cada grupo aseguraba que o seu era o mellor. E despedímonos compartindo comida e bebida. Que máis se pode pedir?

Os grupos de 1º e 2º da ESO uníronse para cantar e bailar o tema Quero ver como te ris de MEDOMEDÁ.

1e2ESO from lingualiza on Vimeo.

3º da ESO escolleu FERTI MON, unha parodia galega do Wrecking Ball de Miley Cyrus, realizada por un grupo de amigos de Páramo Pictures.

eso3 from lingualiza on Vimeo.

4º da ESO, como é o grupo máis numeroso, escolleu dous temas:

A turbobisicleta, un tema de rock festivo de DAKIDARRIA

Fotos de Dakidarria

bisicleta from lingualiza on Vimeo.

O home que quixo vivir, poema de Bernardino Graña musicado por ASTAROT.

Fotos de Astarot

Bacharelato volveu con DAKIDARRIA, pero esta vez co seu rock máis combativo: A mocidade activa.

Foto.

1bac from lingualiza on Vimeo.

@s profes tolearon de todo ao ritmo do Rock do país de RUXE RUXE.

Fotos ruxeruxe

profesRock from lingualiza on Vimeo.

UN PASO ADIANTE NO USO DO GALEGO A FAVOR DUN MUNDO MÁIS XUSTO: DÍA INTERNACIONAL DOS DEREITOS HUMANOS

A paz e a xustiza no mundo son utopías difíciles de acadar. Pero hoxe celebramos que xa existe un camiño polo que avanzar nesta loita: a declaración dos Dereitos Humanos. O alumnado de 1º da ESO buscou na rede fotos de pasos que se imprimiron, escribindo sobre elas os diferentes artigos dos dereitos humanos e pegándoas polo centro. 

D.Humanos from lingualiza1 on Vimeo.

O alumnado de 4º realizou carteis para dar a coñecer esta celebración a partir dunha presentación que se pasou nas aulas e que se proxectou na pantalla da planta baixa.

DEREITOS HUMANOS from lingualiza1 on Vimeo.

 

UN PASO ADIANTE NA DEFENSA DA NOSA CULTURA. NO NADAL REGALA GALEGO.

Xa podes visitar a nosa exposición na planta baixa do instituto, chea de suxestións para agasallos en galego. Podes ver o último en libros, música e  filmes publicados en galego, así como camisetas e paraugas con lemas na nosa lingua e produtos de alimentación etiquetados en galego. As orixinais árbores de Nadal que deseñamos desde os equipos están a gustar moito. Ven visitarnos e énchete de ideas para regalar galego este Nadal!

nadal from lingualiza1 on Vimeo.

 

ESTE NADAL... REGALA GALEGO

A coordinadora de equipos de dinamización do galego de todos os centros do Morrazo recoméndavos libros e música para REGALAR GALEGO este Nadal. Podes ver de preto todas estas suxestións a partir da semana que vén na exposición que estamos a montar na planta baixa do instituto...

EDLGinfantilazul

Edl Primaria

edlg lecturas secundaria

DÍA INTERNACIONAL CONTRA A VIOLENCIA DE XÉNERO.

Aquí estamos na cadea humana organizada desde o instituto ata a Alameda Vella, no centro de Cangas, para sumármonos ao acto convocado pola CIM (Centro de Información da Muller do Concello de Cangas), onde despregamos as pancartas realizadas en cada aula. O galego foi unha vez máis a lingua da reivindicación da fin da violencia de xénero e da defensa da igualdade mos lemas escollidos tras o debate nas aulas e no manifesto que leron Ana e Luís.

 MANIFESTO

Estamos aquí, en primeiro lugar, para dar voz a todas aquelas mulleres que xa non a teñen, 44 mulleres no que vai de ano en España, 700 na última década, a quen lles foi arrebatada a vida por aqueles que dicían querelas.

Estamos aquí para denunciar o maltrato, a tortura física e psicolóxica, a humillación… Segundo o Centro de Investigacións Sociolóxicas, só en España padecen violencia de xénero máis de 600.000 mulleres aínda que menos da cuarta parte se decidan a contalo. Esta violencia machista afecta tamén a máis de 800.000 nenos e nenas, fillos e fillas das mulleres maltratadas.

Como é isto posible na sociedade moderna na que vivimos? Os estereotipos machistas non son cousa do pasado nin da xente maior. Estamos aquí para alertar de que seguen presentes na nosa sociedade e tamén nos afectan a nós, a xente máis nova. Os centros de atención a malos tratos coinciden en que cada vez son más novas as mulleres que acoden a pedir axuda.

Estamos aquí para afirmar que a violencia de xénero non desaparecerá mentres exista unha relación desigual entre homes e mulleres. Mentres non desaparezan as falsas xustificacións, mentiras e mitos que defenden a superioridade dos homes sobre as mulleres, mentres haxa homes que sigan pensando que as mulleres son a súa posesión.

Vivimos nunha sociedade que segue valorando positivamente as múltiples conquistas amorosas do home e criticando e insultando a muller nesa mesma situación, esperando dela que siga agardando toda a vida polo príncipe azul.

O modelo de amor romántico que se nos vende en novelas e películas segue a ser, en moitos casos, o de home dominador e posesivo e muller sometida e entregada a cumprir os seus desexos.

As redes sociais teñen hoxe un efecto multiplicador dos comportamentos machistas, dos insultos e ameazas ás mulleres.

ESTARMOS AQUÍ, denunciando a violencia de xénero, COMPROMÉTENOS a actuar desde todos os medios que teñamos na nosa man para poñer fin á violencia exercida contra as mulleres:

- abrindo os ollos ao noso entorno máis próximo, para apoiar as vítimas de maltrato e axudalas a saír desa situación e a procurar a axuda que necesiten.

- esixindo ás administración medidas que as protexan e medios para que poidan recuperar a súa vida.

- mostrando unha tolerancia cero ante calquera comportamento de humillación e maltrato do que sexamos testemuña.

ESTAR AQUÍ COMPROMÉTENOS

- a esixir que, tanto desde as administración como desde o sector privado, se promovan medidas que fomenten a igualdade entre homes e mulleres.

- a esixir que se reforcen as accións no ámbito educativo, nos medios de comunicación e nas redes sociais  contra os estereotipos sexistas e a violencia de xénero.

- a esixir que a educación en valores,  a educación afectiva e a educación en resolución  de conflitos estea presente na escola e, moi en especial, na formación do alumnado adolescente.

ESTARMOS AQUÍ COMPROMÉTENOS tamén a non baixar a garda porque calquera de nós pode ser vítima da violencia de xénero nas súas relacións de parella. Temos que estar atentas e saber recoñecer os sinais de alarma: as manipulacións, a imposición sobre como debemos vestir e actuar, a obsesión polo control hoxe acentuada cos localizadores dos móbiles ou co bombardeo de whatshapps esixindo resposta inmediata.

E a saber dicir BASTA, defendendo a nosa independencia e a nosa dignidade. Porque eses non son signos de amor senón de abuso e de acoso.

- ESTARMOS AQUÍ COMPROMÉTENOS a entender a relación de parella como unha relación entre iguais que se fundamente sempre  no respecto mutuo.

25 de novembro. Día Internacional contra a violencia de xénero.

Grazas a todas e a todos pola vosa participación.

UN PASO ADIANTE PARA FACER DO CARBALLAL DE COIRO UN ESPAZO COMÚN

Este curso queremos continuar co proxecto de poñer en valor o fermoso Carballal que temos na parroquia de Coiro, á que pertence o noso instituto, en colaboración coa Comunidade de Montes. Por iso algún alumnado de 2º da ESO, que descubrimos o ano pasado esta gran riqueza medioambiental que temos tan preto da casa, fomos contarllo ao alumnado de 1º da ESO. Presentámoslle o blog que creamos http://vivimosencangas.blogspot.com.es/ e alí puidemos ver moitas fotos e consellos para a saída. Insistímoslles en que prestasen moita atención aos comuneiros, pois a el@s lles debemos a conservación do Carballal.

UN PASO ADIANTE CONTRA A VIOLENCIA DE XÉNERO

Grazas a tod@s @s que fixestes posible que encheramos a planta baixa do instituto de carteis contra a violencia de xénero. Aquí tedes todos os carteis que están expostos para lembrar a toda a comunidade educativa a celebración, o 25 de novembro, do Día Internacional contra a violencia de xénero. 

non á violencia de xénero from lingualiza1 on Vimeo.

  

non a violencia de xenero de Bac from lingualiza1 on Vimeo.

Á PROCURA DE VITAMINAS

Despois do traballo  na clase sobre a estrutura e funcionamento do noso aparato dixestivo, a importancia da nutrición  no mantemento da vida, o papel das vitaminas no funcionamento do corpo, realizamos no laboratorio unha práctica sobre a cantidade de Vitamina C nas principais froitas de temporada. Foi moi interesante.

UN PASO ADIANTE CONTRA A VIOLENCIA DE XÉNERO

O día 25 deste mes celébrase o Día Internacional contra a Violencia de Xénero. Precisamos da colaboración de tod@s - pais e nais, profesorado, alumnado e persoal non docente- na tarefa de dar vida á nosa lingua, neste caso para rexeitar a violencia de xénero e defendera a cultura da paz e da igualdade.  Préstanos a túa imaxe e os teus lemas en galego. Achégate a usos múltiples en calquera recreo se queres DAR UN PASO ADIANTE e participar nesta iniciativa.

UN PASO ADIANTE NA DEFENSA DA CIENCIA EN GALEGO.

Hoxe 12 de novembro, como cada ano por estas datas, unímonos ás organizacións que convocaron o IV Día da Ciencia en galego. O alumnado de Bacharelato participou, xunto a alumnado doutros moitos centros de ensino, nunha videoconferencia organizada pola Coordinadora Galega de Equipos de Normalización e Dinamización Lingüística. Ás 12.30 horas e ao longo de máis dunha hora seguiron as explicacións do profesor Jorge Mira Pérez, doutor en Física e Catedrático da área de Electromagnetismo do departamento de Física Aplicada da Universidade de Santiago de Compostela (USC), sobre 'Como medir tamaños e distancias da Terra, a Lúa e o Sol' e puideron realizar preguntas a través dun chat na propia sala virtual da videoconferencia.

Ese mesmo día, alumnado da ESO elaborou, seguindo unha presentación con instrucións, un pequeno helicóptero en papel azul ou branco, reflexionando sobre as leis científicas que facían posible que baixase xirando.

No recreo, leuse un manifesto que rematou co lanzamento dos helicópteros.

DIA DA CIENCIA EN GALEGO

MANIFESTO

Hoxe, día 12 de novembro, o IES de Rodeira únese á celebración do Día da ciencia en galego. Se queremos que o galego sexa unha lingua de futuro non podemos renunciar a que sexa lingua da ciencia e da tecnoloxía. E ese camiño comeza no ensino. Porque é aprendendo en galego matemáticas ou física, tecnoloxía, informática ou electrónica; formulando, investigando, montando circuítos, aprendendo a programar ou experimentando no laboratorio... como entendemos que a nosa lingua non nos limita senón que nos enriquece e nos prepara para o diálogo con todas as culturas do mundo.

Hoxe recibistes en galego unha clase de física moi especial e construístes, segundo as leis da física, un helicóptero azul e branco capaz de xirar e voar paseniño, vencendo a lei da gravidade. Defendemos así un espazo para a nosa lingua non só no universo da cultura literaria senón tamén no da científica e da tecnolóxica.

Se estades en contra de poñerlle límites ao galego, se defendedes que sexa unha lingua moderna e de futuro, preparádevos para deixar voar o galego. Preparados? Todos xuntos á de tres...

Non deixedes de intentalo. Preparade os vosos helicópteros unha vez máis para que o galego poida saír voando nas fotos. Un, dous tres...

E para rematar este acto festivo imos agradecer o compromiso co galego do profesorado de todo o ámbito científico e tecnolóxico cun forte aplauso.

FESTA DO MAGOSTO: UN PASO ADIANTE NA DEFENSA DAS NOSAS TRADICIÓNS E DA RIQUEZA DA DIVERSIDADE CULTURAL NO MUNDO.

A CASTAÑA é a gran protagonista do mes novembro. Nas aulas estudamos a súa importancia histórica como base da alimentación galega ata a chegada da pataca e do millo de América. De aí a existencia de moitos topónimos e apelidos relacionados con ela: souto/s, soutelo/s, souteliño/s, castiñeiro/s, castiñeira/s. Aínda hoxe, a castaña galega é moi apreciada e goza de Indicación Xeográfica Protexida pola súa calidade. 
  

 

No mes de novembro, a castaña recupera o seu protagonismo histórico na festa do MAGOSTO, unha celebración que unía aos veciños nos soutos e nas prazas, ao aire libre. Nós tamén abandonamos as aulas para xuntármonos en torno ao lume, as castañas e á musica, cantigas e bailes moi nosos que non queremos perder. E tamén nos achegamos a outras tradicións, bailando danzas do mundo que aprendemos nas clases de Educación Física. Unha forma divertida de mantérmonos en forma. E, por suposto, carreiras e caras moi negras, como ten que ser.

CONVERSA EN GALEGO PARA PERSOAS ADULTAS

SAMAIN NAS AULAS

Así de decoradas quedaron as aulas do instituto para celebrarmos o Samaín.

3º ESO A foi a aula gañadora. Mesmo fixeron unha pequena dramatización que incluía un libro máxico no que cada alumno se convertía nun superheroe con diferentes poderes.

DEMOSTRA OS TEUS DOTES DE CAZAPANTASMA: XINCANA

Aquí tedes as fotos da xincana do alumnado de 1º da ESO, na que competiron en grupos, saíndo unha parella de cada vez, para contestar o maior número de preguntas no mínimo tempo, buscando a información nos taboleiros da exposición do SAMAÍN e memorizándoa. Parellas de alumnado do equipo de 4º da ESO  axudaron ao alumnado máis pequeno a gardar a orde de saída, a buscar nos taboleiros e tamén fixeron de xuíces e xuízas escoitando as súas respostas en perfecto galego e selando as tarxetas para dar saída á parella seguinte.

DEMOSTRA OS TEUS DOTES DE CAZAPANTASMA: CONCURSO

DEMOSTRA OS TEUS DOTES DE CAZAPANTASMA: CONCURSO

DEMOSTRA OS TEUS DOTES DE CAZAPANTASMA: CONCURSO

DEMOSTRA OS TEUS DOTES DE CAZAPANTASMA: CONCURSO

CONCURSO-EXPOSICIÓN DO SAMAÍN

O concurso-exposición do Samaín está a ser todo un éxito grazas á colaboración de profesorado e alumnado.  As cabazas tiveron un espazo destacado pero houbo catro máis en torno ás historias tradicionais asociadas ao poder escuro dos catro elementos básicos: auga, lume, terra e aire, nos que, xunto á información escrita, reproducimos os personaxes a tamaño real.

AS CABAZAS

                                    

No centro da exposición tivemos dúas fermosas cabazas talladas por dous alumnos de 1º de ESO que obtiveron premio no concurso. Tamén houbo un mural cunha grande cabaza e outra feita en papel pero chea con bolsas de lixo para darlle volume. Xunto a elas carteis explicativos da tradición celta do Samaín e do costume de taller e acender cabazas esa noite.

 

 AS FORZAS DO LUME

- No espazo dedicado ás forzas do LUME montouse un aquelarre con tres bruxas arredor do lume.

 

                                            

AS FORZAS DA AUGA

No espazo dedicado á auga houbo unha fonte, un lago, un río e un mar cheo de ondas onde cobraron vida a lenda da Poza da moura, a historia das lavandeiras da noite no río, a atracción fatal de fadas dos lagos e sereas e a lenda sobre os xacios e xacias do río Miño.

AS FORZAS DA TERRA

No espazo das forzas da TERRA nun camposanto de terra cheo de tumbas, zombies, esqueletos e momias e ata un lobishome deron vida á tradición de Santo André de Teixido e aos relatos de Ánxel Fole, Dieste, Castelao e Risco.

  AS FORZAS DO AIRE

Para as forzas do AIRE, organizamos un espazo en torno á Santa Compaña, espíritos e seres fantasmais e outro espazo dedicado a morcegos e vampiros.

MÁIS TRABALLOS PRESENTADOS AO CONCURSO:

- Murais presentados polo alumnado de 1º Bacharelato de Debuxo artístico.

E dous vídeos que se proxectarán na pantalla da planta baixa do instituto:

- O panteón dos esquecidos dun grupo de alumnado de 4º.

O panteón de olvidados ilustres from lingualiza on Vimeo.

- un vídeo do alumnado de 2º de Bacharelato de Arte e ademais unha reportaxe fotográfica en branco e negro.

samain from lingualiza on Vimeo.

APRENDENDO HISTORIA NO CASTELO DE SOUTOMAIOR

O alumnado de 3º da ESO visitamos o castelo de Soutomaior. Está situado nun lugar que domina o territorio enmarcado polo val do río Verdugo, dende a súa confluencia co Oitavén ata a súa desembocadura na enseada de San Simón, en Arcade, permanecendo así agochado das invasións realizadas por mar de normandos, turcos ou  piratas.  Contáronnos que a construción orixinal data do século XII, se ben será con Pedro Álvarez de Soutomaior, coñecido polo alcume de Pedro Madruga co que alcance o seu máximo esplendor xa que chegou a ser o epicentro da actividade política do sur de Galicia durante o século XV. Foi derruído durante a Revolución Irmandiña e Pedro Madruga intervirá moi directamente na súa reconstrución. No século XIX o castelo pasa a mans do marqués da Vega de Armijo que o transforma, coa construción neogótica da "Galería de Damas", nunha residencia de verán.

No seu interior puidemos pasear polas antigas estancias totalmente restauradas. Estes espazos empréganse para exposicións. Na que nós visitamos, acompañados dun guía, puidemos informarnos nos paneis sobre as formas de vida da sociedade medieval e mesmo experimentar, probando armas como a espada, o arco  e a bésta.

Nos extramuros, visitamos tamén os maxestosos xardíns onde sobreviven castiñeiros de oitocentos anos de antigüidade. Teñen unha rica, variada e centenaria flora, unha praza rodeada de plátanos, unha avenida de hortensias e unha fermosa e variada colección de camelias.

CONCURSO SAMAÍN

Xa está convocado o concurso do Samaín. Axúdanos a encher a planta baixa e as aulas do instituto de creatividade, dando un paso adiante en defensa da nosa cultura propia. Poñede xa en marcha as vosas ideas para, de xeito individual ou en grupo, encher de creatividade as aulas e a planta baixa do centro inspirándovos nos personaxes da tradición galega e nas historias e lendas de medo e de terror. Aquí tedes unha presentación para inspirarvos.

CONVERSA EN GALEGO É A TÚA LINGUA

Hoxe tivemos o primeiro encontro de todo o alumnado e profesorado que se anotou aos equipos. Xogamos a unha especie de twister feito cos todos os pés nos que asinamos o noso compromiso de ir ás reunións semanais e falar en galego. Había dúas rodas: nunca sorteábase a cor e noutra o curso. Se dicían o teu curso había que saír e colocarse nos pés da cor que saíra. Entón Manuel preguntábamos: quen sodes? E nós iamos berrando os nosos nomes. E logo: a que vos comprometedes? E entón había que contestar todos xuntos: a conversar en galego. E agasalláronnos con adhesivos cun logo parecido ao da marca de zapatillas converse pero que dicía: CONVERSA EN GALEGO: É A TÚA LINGUA. Xa organizamos os equipos para as reunións semanais: : luns, 3º da ESO; martes, bacharelato e ciclos superiores; mércores: 4º e ciclos medios; xoves: 2ºESO; venres, 1º ESO. Se te queres incorporar, ven no segundo recreo o día que che toque á sala de usos múltiples.

XA ES PARTE DO EQUIPO?

 Viñeches anotarte ao equipo e asinar o teu pé? Bule que o mércores 25 teremos a 1ª reunión para todos os anotad@s.

 

UN PASO ADIANTE: CONVERSA EN GALEGO

Aquí estamos de novo desde o equipo de dinamización invitándovos a DAR UN PASO ADIANTE na defensa da nosa lingua propia. E fixémolo enchendo o instituto con zapatillas da marca que nos distingue: CONVERSA EN GALEGO. Esa é a nosa invitación. VEN: HAI UN EQUIPO AGARDANDO POR TI. Anótate nos recreos desta primeira semana de clase.

CONVERSA EN GALEGO from lingualiza on Vimeo.

GALEGA DESDE O CARIÑO

Ana, Nerea e Luis, alumn@s de 3º da ESO, entrevistan a súa profesora de matemáticas, Carmiña. Ela é canaria e cóntanos a súa descuberta da nosa cultura e da nosa lingua que aprendeu a falar desde o cariño e o desexo de que sexa unha lingua viva.

entrevista Carmen de las Casas from lingualiza on Vimeo.

CHEGA O VERÁN. QUERES SENTIRTE EN PLENA FORMA? MÓVETE, RESPIRA E COME FROITA FRESCA.

Chega o verán, o bo tempo e xa están moi preto as vacacións. É hora de saír da casa, de tanto tempo pechados estudando e facermos exercicio ao aire libre. É tempo de nadar e correr pola praia, subir ao Facho, pasear pola fermosa carballeira de Coiro... e comer moita froita para poñerse en plena forma. Grazas ás dúas semanas máis que nos concederon do Plan de consumo de froita nas Escolas xa puidemos saborear amorodos, nésperas, melocotóns, nectarinas, cereixas e sandías... froita de tempada que está riquísima. Segue practicando no verán!

Neste mes remataron as charlas nas aulas sobre reciclaxe de residuos orgánicos as visitas ao compostoiro e o pequeno horto que temos no instituto.. Aquí tedes fotos do alumnado de 4ºA. Se queredes lembrar a presentación que se levou polas aulas premede neste enlace:

http://observatoriorodeira.blogspot.com.es/2013/06/visita-didactica-horta.html

Co a chegada do bo tempo, puidemos ir á praia nas clases de educación física e comezar a gozar do sol, do aire e do mar. Mesmo fixemos un curso de kaiak e windsurf!

Para rematar a nosa campaña publicitaria, organizamos un picnic froiteiro no recreo e gravamos dous anuncios.

publicidade do consumo de froita from lingualiza on Vimeo.

campaña consumo de froita from lingualiza on Vimeo.

AFRICA-NÓS

Na Semana Intercultural propuxemos un achegamento a África, un continente cheo de cor. Contamos cunhas guías de excepción, alumnas do instituto que son africanas e nos achegaron aos lugares dos que proceden, ás súas linguas e culturas.

Interculturalidade maio 2014 from lingualiza on Vimeo.

Descubrimos tamén que a nosa lingua galega ten unha importante función internacional porque nos permite achegarnos dun xeito especial a cinco lugares africanos aos que os portugueses levaron, no século XV, o galego-portugués medieval que aínda seguen a falar xunto ás súas linguas propias. Pescudamos a súa localización, as características da súa paisaxe e a músicos e escritores, descubrindo que eramos quen de comprendelos sen necesidade de tradución. Ficamos orgullos@s de termos unha lingua que nos permite comunicarnos con xentes de lugares tan afastados xeograficamente.

galegofonias2014 from lingualiza on Vimeo.

QUE SUBA O PANO!

O IES de Rodeira fixo coincidir a exposición Que suba o pano! coas Letras Galegas, dedicadas este ano a un grande do teatro galego: Roberto Vidal Bolaño. Este proxecto partiu do CEIP A Pedra de Bueu coa intención de dar a coñecer entre a comunidade escolar os libros do Fondo Teatral María Casares, depositados na Biblioteca Municipal de Cangas.

O teatro galego forma parte do currículo de 4º da ESO e de 2º de Bacharelato e foi alumnado destes cursos o que montou a exposición para o resto da comunidade educativa. Para iso baixaron ao corredor que está diante da Biblioteca co libro de texto ou cos apuntamentos de literatura. Ordenaron os libros de teatro galego de xeito cronolóxico en tres grandes etapas, achegando información sobre elas: o teatro galego de 1900 a 1936, o teatro galego de 1936 a 1970 e o teatro galego actual, a partir das Mostras de Teatro de Ribadavia, etapa que coincide coa produción de Roberto Vidal Bolaño. Tamén houbo unha sección para as traducións e outra para as revistas de teatro e os Cadernos da Escola Dramática. Para ambientar esta exposición, utilizamos os carteis chegados da Xunta con motivo das Letras Galegas e un pequeno escenario, feito con caixas e teas e adornado con máscaras de nariz vermello sobre o que colocamos unha figura de Roberto Vidal Bolaño e dalgúns dos personaxes das súas obras, feitas de cartón.

que suba o pano from lingualiza on Vimeo.

TI ES PARTE DO PLANETA EN QUE VIVIMOS. ACTÍVATE E DEFENDE A BIODIVERSIDADE.

No Día da Biodiversidade, cubrimos as paredes do instituto de verde e asumimos a tarefa de divulgar mediante un gran mural todo o que aprendemos no carballal de Coiro, un espazo do noso concello que, grazas á Comunidade de Montes de Coiro, segue conservando toda a biodiversidade do bosque autóctono galego. Veu visitarnos o alumnado de 6º de Coiro e da Rúa, os nosos centros adscritos, e nós, o alumnado de 1º da ESO, explicámoslle como fora o desenvolvemento do noso traballo, e fixémolo en galego, porque a biodiversidade tamén afecta ás linguas e é tarefa nosa manter vivo o galego no seu espazo natural do que Cangas forma parte.

carballal from lingualiza on Vimeo.

CELEBRANDO AS LETRAS

O 16 de maio celebramos no instituto un pequeno acto en homenaxe de Roberto Vidal Bolaño no que o equipo de Dinamización da Lingua Galega realizou a súa habitual entrega de premios. O grupo de teatro A Replika e a Comunidade de Montes de Coiro foron os premiados nesta ocasión.

Rematamos a festa con xogos populares.

O GALEGO, A CHAVE DO MUNDO

Os coles do Morrazo reuníronse o 10 de maio en Bueu para celebrar cunha gran festa que o galego é a nosa lingua propia e para defender que debe ser a lingua na eduquemos aos nosos nenos e nenas para darlles a chave coa que acceder ao mundo da diversidade e do plurilingüismo. É unha riqueza da que sentírmonos orgullosos e orgullosas e demostrámolo na grande marcha do CORRELINGUA polas rúas de Bueu, cantando e berrando.

O equipo de dinamización da lingua galega do noso instituto quixo estar aí, botando unha man para que todo saíse perfecto, labor que compartimos co alumnado do instituto Johan Carballeira de Bueu. Aquí nos vedes a algúns axudando na organización da marcha.




Outr@s quedaron c@s peques organizando obradoiros de xogos.



Neste ano dedicado a Roberto Vidal Bolaño, contamos coa presenza de actor de Moaña, Celso Parada, que leu o manifesto gañador do concurso do Correlingua e recitou Deitado frente ao mar de Celso Emilio Ferreiro. E rematamos cantando e bailando coa magnífica actuación en directo de Manuel Prego.

SAXO TENOR NO VAIDELIBROS

Queda xa pouco tempo para a nosa cita no club de lectura Vaidelibros con Saxo Tenor de Roberto Vidal Bolaño. Aquí vos deixamos algunhas reflexións para animar o debate.