17.12.15

QUEREMOS MÚSICA EN GALEGO



O último día do trimestre, como xa é tradición, todos os equipos do EDLG xuntámonos para gozar dunha festa con música en galego. Cada equipo presentou un videoclip para presentarse e logo invitar a todos e todas a cantar e bailar. 1º da ESO triunfou co rapeado da canción gañadora do Correlingua do curso pasado: O GALEGO É DE TODOS E TEU TAMÉN. 




2º da ESO realizou un divertido vídeo musical da canción Quero ver como te ris de MEDOMEDÁ.





3º da ESO non deu feito e castigámolos a saír ao escenario e facer algo en directo para presentarse. 


 



4º da ESO fíxonos moitas ganas do verán con Fai sol de TERBUTALINA. 





O alumnado de Bacharelato escolleu o tema Terra de DAKIDARRIA e fixo unha versión achegándoo á realidade de Cangas. 





O profesorado tamén participou bailando o tema de LAMATUMBÁ: Camiños





Pasámolo xenial. E ao final, compartimos uns petiscos. Que máis se pode pedir?





14.12.15

NADAL EN GALEGO



Chegou o momento de adornar o instituto para anunciar a chegada do Nadal. E que mellor adorno que a nosa cultura? Visitamos o Culturgal e pedimos novidades ás editoriais galegas para expoñelas no centro. E montamos unha gran árbore de Nadal con flores de papel e portadas das últimas novidades de literatura e música en galego:  libros de poesía, novelas, ensaio, de contos infantís e banda deseñada, discos e películas.








E outra con produtos galegos etiquetados na nosa lingua e camisetas con lemas en galego, porque queremos o noso, na nosa lingua.








E na nosa campaña para animar a que o galego forme parte dos nosos agasallos e comidas de Nadal tamén repartimos trípticos, deseñados nas xuntanzas coa Coordinadora de Equipos de Dinamización do Morrazo, con recomendacións por idades de lecturas e música en galego no centro, no concello, no centro de saúde, na biblioteca municipal e nas librarías de Cangas. 










11.12.15

QUEREMOS DEREITOS HUMANOS



Non pode haber igualdade nin xustiza senón é polo camiño dos dereitos humanos. No mes de decembro, o alumnado de 2º traballou desde a materia de Educación para a cidadanía na elaboración dun fermoso libro que recolle a redacción dalgún dos "dereitos humanos" tomados de distintas fontes así como textos alusivos aos mesmos e imaxes que ilustran o seu contido. Fixeron unha presentación oral do traballo na biblioteca onde quedou gardado o libro para que o poidades ver.






E empregamos unha vez máis a nosa lingua e o lema do proxecto do EDLG para encher os corredores do 1º andar de mensaxes a favor dos dereitos humanos para todos e todas. Tras a súa lectura en galego nas horas de titoría, cada alumno ou alumna escolleu o que lle parecía máis necesario reivindicar para encher tiras de papel co lema que se colgaron con pinzas nun longo tendal.






7.12.15

AS ALMAS GRISES



 Hoxe tivemos unha nova sesión do club de lectura Vaidelibros, aberto a toda a comunidade educativa. A obra escollida foi esta vez  As almas grises, unha tradución da obra do escritor Philippe Claudel , que foi elixido Libro do Ano polos libreiros franceses e a revista Lire , ademais de ter recibido o Premio Renaudot.  Aínda que existe a tradución ao galego e ao castelán, desde a biblioteca repartíronse exemplares en galego para fomentar a lectura na nosa lingua da literatura universal.  


30.11.15

NEIRA VILAS SEMPRE


Aínda que Neira Vilas vén de nos deixar, seguirémolo atopando no espírito de Balbino, un “ninguén” que escribe as súas memorias de neno labrego para todos os outros “ninguén”, para dicir en voz alta desde a inocencia dun neno como era a vida dos fillos dos labregos, a gran maioría silenciosa, e para negarse a deixarse arrebatar a dignidade aínda que iso signifique ter que abandonar o mundo coñecido.  E a súa verdade foi escoitada: as Memorias dun neno labrego foron durante anos o libro máis vendido da literatura galega, chegando a vender 600.000 exemplares. Como tantos e tantas galegos, Neira Vilas marchou á procura dunha vida mellor, nunha viaxe vital que o levou da súa aldea de Gres a Buenos Aires no ano 41 para descubrir a súa identidade nas Mocedades Galeguistas, ao lado de Luís Seoane, Rafael Dieste, Lorenzo Varela, Blanco Amor…, fundando alí a editorial Follas Novas e casando coa que sería a súa inseparable compañeira, Anisia Miranda. Xuntos estableceranse en Cuba desde o 61, participando no soño do goberno do pobo e traballando na sección galega do Instituto de Literatura e Lingüística. Moitos anos de viaxes de ida e volta ata o retorno definitivo nos 90 á aldea de Gres onde permanece a súa Fundación. Traballador incansable: novela, relato, poesía, contos para nenos e nenas, ensaio…  Neira Vilas recibiu todos os premios e recoñecementos desde a súa profunda humildade de home do pobo, sempre disposto a ir onde o chamasen, a recibirnos na súa casa, á conversa entrañable. Queda para sempre con nós na súa obra, unha lección da procura constante da verdade e da xustiza.

 
Coma homenaxe, a bilbioteca organizou unha lectura polas aulas do comezo de Memorias dun neno labrego e desde o EDNL invitamos a cantos queiran participar a recrear e actualizar as experiencias contadas por Balbino. Os mellores textos serán publicados neste blog e na revista Abre os ollos. Participa!

25.11.15

QUEREMOS LOITAR CONTRA A VIOLENCIA DE XÉNERO



Oímos nos telexornais ou lemos na prensa novas de mulleres que son asasinadas a mans dos seus homes. Pero na actividade que fixemos para participar nos actos reivindicativos do Día contra a Violencia machista coñecemos os nomes propios de 50 mulleres asasinadas ao longo deste ano 2015. Buscamos na rede as novas das súas mortes e fixemos necrolóxicas en galego en tamaño pancarta e flores de papel como símbolo da nosa tolerancia cero contra toda violencia de xénero, desde os micromachismos ata as agresións físicas ou psicolóxicas. 








E o 25 de novembro todo o instituto saíu á rúa coas pancartas e as flores para denunciar e pedir o compromiso de todos e todas para construír unha sociedade xusta e igualitaria. Fomos ata a Praza das Pontes e alí lemos un fermoso manifesto. E, ao regresar, colgamos do enreixado do instituto as pancartas coas necrolóxicas e as nosas flores como ofrenda.









O alumnado de 4º da ESO, xunto a alumnado doutros centros de Cangas (Casa da Virxe, Eduardo Pondal, Montecarrasco, María Soliña e Xoán XXIII) participamos ademais na intervención "Empatiza", unha pintada colectiva de mensaxes contra a violencia de xénero que se fixo nun dos muros do concello de Cangas, unha obra colectiva efémera de arte urbano con xiz, un gran mural no que depositamos as nosas mensaxes para demostrar que si se pode educar dende a igualdade e demostrar a todo un pobo que o cambio é posible, que nós somos o motor da transformación para ser mellores en sociedade. Elaborar unha obra de arte urbana nun lugar tan simbólico como é a parede do  concello foi unha boa forma de  visibilizar e concienciar ao maior número posible de persoas. As imaxes tomadas pola fotógrafa Rosa Neutro  durante a acción EMPATIZA  quedaron recollidas nun caderno que será expostos ao público e logo pasará a formar parte da biblioteca municipal de cada concello.








24.11.15

ABRE OS OLLOS E REXEITA OS MICROMACHISMOS


Parece que damos por sentado que todos e todas rexeitamos as actitudes machistas e o maltrato á muller por ser considerada inferior e sometido ao home. Sabemos tamén que esta violencia pode ser física e tamén verbal ou psicolóxica. Pero cómpre reflexionar sobre certos comportamentos ben vistos pola sociedade que nos rodea, que se asentan en estereotipos sobre homes e mulleres cheos de prexuízos que provocan formas de maltrato sutil pois condicionan o comportamento e impiden que poidamos actuar libremente sen sentírmonos xulgados. Coñécense co nome de MICROMACHISMOS e debemos rexeitalos ata facer que desaparezan da normalidade social. Non é cousa doutra época. As estatísticas advírtenos da presenza destas actitudes en xente nova. Cómpre abrir os ollos e practicarmos e esixirmos a igualdade real no mundo que nos rodea.



De Buzón
  Esta publicidade do franquismo parécenos moi superada pero hai na sociedade actual moitos micromachismos que seguen a manter o papel de “muller-floreiro”, esixíndolle un coidado no aspecto que non é necesario no home. Podemos detectar tamén moitos micromachismos na publicidade en xeral e na de xoguetes en particular, en contos e en películas infantís que seguen a explotar a idea da “muller-princesa”,  fermosa e delicada, cuxa vida só ten sentido cando atopa o seu príncipe azul,  forte e valente.

De Buzón

O amor romántico asóciase á fidelidade ata converterse en posesión e xustificar celos que conducen ao maltrato a través do control persoal e emocional, coa supervisión do móbil ou dos amigos ou a través da violencia verbal ou física. No referente ao comportamento sexual a vara de medir segue sendo moi diferente.  As múltiples conquistas son valoradas positivamente no home e  duramente criticadas nas mulleres.
 
 
De Buzón

 
É un comportamento do pasado esa actitude masculina de sentirse con dereito a ocupar o dobre de espazo que as mulleres e esa actitude feminina de sacrificar a súa comodidade ata o punto de permitir o abuso dos demais? Por que as mulleres, a pesar de que  xa levan pantalóns, seguen a ser educadas para sentarse “como señoritas” e os homes non? Este comportamento bastante común no transporte público, de sentarse os homes coas pernas abertas, mentres que as mulleres adoitan sentar coas pernas cruzadas e ocupando menos espazo, en inglés chámase manspreading e está considerado un tipo de micromachismo.
 
De Buzón
De Buzón

A pesar dos avances na dedicación dos pais ao coidado dos fillos segue parecendo natural que os cambiadores de cueiros estean no baño de mulleres e segue estando mal visto socialmente por maiores e pequenos que os nenos xoguen con bonecas. Tamén se considera normal que sexan as mulleres as que coiden dos maiores, aínda que teñan irmáns varóns ou aínda que os maiores sexan da familia do home.
 
De Buzón
 
De Buzón
O traballo doméstico segue asociándose con normalidade ás mulleres, dándose por suposto que se debe ocupar del e culpándoa de calquera deficiencia na limpeza, na orde ou e no coidado dos fillos en moita maior medida que ao home, aínda cando traballe fóra da casa. A sociedade valora positivamente que os homes “boten unha man” nun traballo que se segue considerando feminino, cando deberiamos esixir corresponsabilidade.

Rematar cos roles discriminatorios e coas esixencias de control e posesión nas relacións de parella é avanzar para poñer fin á violencia de xénero. 
                                                                                    


19.11.15

DESCUBRINDO OS MICROMACHISMOS



Achégase o 25 de novembro e por iso esta semana nas titorías e nas aulas estivemos debatendo e escribindo en galego sobre as actitudes machistas que se manteñen moi preto de nós e das que non sempre somos conscientes, a partir dunhas imaxes que estaban polos corredores e que tamén nos proxectaron na aula.






12.11.15

QUEREMOS SER BOS CONSUMIDORES


O mércores 11 de novembro  alumnado de 2º da ESO e FP Básica fomos ao Instituto Galego de Consumo e Publicidade en Santiago. Ao longo dos corredores había vitrinas con produtos retirados do supermercado. Dividíronnos en grupos para facer obradoiros. Na aula había un supermercado virtual.  Primeiro reflexionamos, a través de xogos, sobre a súa estrutura e sobre como chegan alí os produtos. Pero a mellor parte foi comprar de mentira no súper e deseñar un novo produto cunha caixa e un rotulador. O segundo obradoiro foi moi divertido. Dividiron o grupo. Dous saían fóra onde lles explicaban que tiñan que seguir a parella que quedara dentro que estaban a facer a compra con diñeiro de mentira e facerlles unhas preguntas. Tamén fixemos un obradoiro sobre videoxogos. Explicáronnos o sistema PEGI de clasificación por idades. Despois deseñamos un ficticio e tivemos que explicar en que consistía. Pasou o tempo voando. Ao rematar fomos ao centro comercial e tivemos tempo para comer e ver tendas. Foi unha excursión moi interesante  e xa lle estamos a tirar proveito aos coñecementos adquiridos nos distintos xogos. Recomendamos esta excursión porque se aprende sobre consumo e publicidade de xeito divertido e didáctico.    


  
 
 

6.11.15

AO MAL TEMPO, PANDEIRETAS E CASTAÑAS



Amolounos a chuvia e foi un magosto sen bailes. Tivemos que apertarnos ben debaixo do tellado,  pegadiños ao lume. Pero queremos tanto as tradicións que fixemos festa ao son das pandeiretas e cantando ben forte as nosas cantigas. Porque non queremos que se perda ese legado, o equipo do alumnado maior aceptamos encantados o desafío de transmitir ao alumnado máis novo a nosa tradición musical. Que ningún alumno ou alumna marche de Rodeira sen saber cantar A saia da Carolina, O ghato, A rianxeira e tantas outras. O obradoiro de baile que tiñamos preparado terá que quedar para o curso que vén.



4.11.15

QUEREMOS CIENCIA EN GALEGO




O alumnado de Bacharelato acudiu hoxe a unha videoconferencia: A máquina que constrúe a mente e a realidade. Foi impartida polo investigador da Universidade de Santiago Xurxo Mariño Alfonso, organizada pola Coordinadora de Equipos de Normalización e compartida con outros institutos, na celebración do Día da Ciencia en galego. Ademais de seguir a conferencia vía web, tivemos a posibilidade de interaccionar co relator vía chat facéndolle preguntas. Resulto moi amena e interesante.






29.10.15

MURAIS TERRORÍFICOS



Chegamos ás portas do Samaín con todo un corredor decorado polo alumnado de Debuxo artístico. Mete medo de verdade!!! 







28.10.15

A FORZA CREATIVA DO MEDO


O alumnado de 4º debatemos na aula de galego sobre os nosos medos e traballamos logo esas ideas en poemas e relatos. E descubrimos grandes artistas. Podedes ilos ler ao taboleiro do 1º andar. Tamén vos deixamos aquí algúns fragmentos.