GALEGO E PORTUGUÉS, CHAVES DO AUDIOVISUAL E DO TEATRO

Atención!!! Chamada ao grupo de profesorado, alumnado, persoal non docente e pais e nais, a cantos e cantas desexedes gozar do audiovisual e do teatro na nosa lingua.

No Auditorio, dentro da XII semana de cine CINEMAS OCULTOS, organizado polo cineclub de Cangas

estas son as nosas citas:
- Venres 30 de setembro, ás 21:00 h. Os días afogados, un valioso documental histórico e etnográfico sobre a construción do encoro de Lindoso que anegou Aceredo e Buscalque, dúas aldeas de Ourense, realizado a partir das gravacións dos propios veciños.
- Sábado 1 de outubro, ás 21:00 h. un filme brasileiro en versión orixinal: Hoje eu quero  voltar sozinho, sobre o mundo adolescente.
- Martes 4 de outubro, ás 21:00h un documental colaborativo sobre a temática de xénero, Visións, con dez curtametraxes de cadansúa cineasta galega realizados para o proxecto "Cinema e muller".
- Mércores 5 de outubro, ás 21:00h, Jhom From, un filme portugués en versión orixinal tamén de protagonista adolescente.
- Xoves 6 de outubro, ás 21:00 h., Fóra do continente, un documental dirixido polo cangués Nico Martínez que nos achega á vida na illa de Ons.

E no salón de actos do IES As Barxas, en Moaña, nunha nova edición do seus Circuítos Teatrais de outubro (sábados, ás 22h.)

- Sábado 1 : Nosa Señora das Nubes de Teatro do Morcego
- Sábado 8: Raclette de Ibuprofeno Teatro.
- Sábado 15: Unhas poucas picadelas de Teatro de Ningures.
- Sábado 22: Os amores de Jacques o fatalista de Producióons Teatrais Excéntricas
- Sábado 29: Foucellas de Talía Teatro.

Unha chea de cultura na nosa lingua para comezar ben o curso. Únete ao grupo!. Vémonos na porta dez minutos antes de comezar o espectáculo.

AS LINGUAS MINORIZADAS, CHAVE DO PLURILINGÜISMO

Un ano máis celebramos que Europa é diversa e plurilingüe e descubrimos que o galego, como todas as linguas minorizadas do  mundo, dános unha chave especial para comprender os problemas dos conflitos lingüísticos e a necesidade de tomar medidas para podermos garantir que todas as linguas permanezan vivas como linguas de comunicación nos territorios que as posúen.

Enchemos un gran globo do mundo con todas as linguas que se falan en Europa e conseguimos moitas chaves. Nos recreos toda a comunidade educativa puido participar sacando unha lingua ao chou para cubrir a tarxeta que tiña cada chave co seu nome e o territorio en que se fala. Así, de xeito colectivo, fixemos no primeiro recreo un colorido cartel cheo de chaves e no segundo as tarxetas coa palabra "Gústame" en diferentes linguas formaron a chave da diversidade lingüística e cultural. Porque é un tesouro que precisa de mimos e coidados de todos e todas para poder seguir enriquecendo a toda a humanidade.
Tamén xogamos co alumnado máis novo ao bingo das linguas e repetimos a exposición do test das linguas con preguntas que levan a resposta tapada para que se poidan consultar.

UNHA CHAVE QUE NOS COMPROMETE

Xa tivemos a primeira reunión por nivel dos equipos formados con alumnado voluntario. Recibimos unha chave coa que fixemos un colgante, decorándoa ao noso gusto con esmalte de unllas, papel e tea de cores. Quedaron moi orixinais! Levámolo con nós para que nos lembre todo o curso o noso compromiso de sacar o galego que levamos dentro e abrir con el novas portas de comunicación no instituto, na casa, en Cangas e no mundo.

O alumnado dos equipos asumimos o compromiso de actuar de enlace nos grupos, presentando en galego as actividades do proxecto e invitando á participación aos nosos compañeiros e compañeiras.

Á PROCURA DA CHAVE DO GALEGO

Xa temos o instituto cheo de chaves estarcidas. Así é como estamos asinando o alumnado o noso compromiso de formar parte ao longo de todo o curso dos equipos que andan á procura da chave do galego. Se aínda non viñeches, bule que teremos axiña a primeira reunión!

O GALEGO É A CHAVE

Benvidos e benvidas a un novo curso e a un novo proxecto do Equipo de Dinamización da Lingua Galega do instituto de Rodeira. Queremos descubrir que temos na nosa lingua unha chave marabillosa que nos abre ao reencontro coa nosa identidade, coa nosa cultura propia e ao diálogo desde quen somos con todas as culturas do mundo.  Quen non querería posuír unha chave así? Vén buscala anotándote xa ao EDLG nos recreos na sala de usos múltiples. Hai un equipo agardando por ti! Fíxate ben cantas portas poderías abrir!

campaña inicio pechaduras from lingualiza on Vimeo.

FIN DE CURSO EN CÍES

Que mellor paraíso que Cíes para celebrar que o curso remata e chega o verán?

Tivemos monitores que nos ensinaron a illa e tivemos que dicirlles que falasen en galego. Co ben que o facían! Que mellor xeito que defender o patrimonio natural que facelo defendendo tamén o patrimonio da nosa lingua!

OS CONSELLOS DE SOLETE PARA GOZAR DA PRAIA

Aquí tedes a campaña que fixemos o alumnado de 4ºD coa nosa mascota SOLETE no instituto e na praia de Rodeira cos seus mandamentos para que gocedes do sol sen risco para a vosa saúde e conservemos o marabilloso entorno da nosa costa.

 

CONTOS EN GALEGO PARA NENOS E NENAS

Os máis pequenos son o futuro do galego e o EDLG de 2º da ESO quixo implicarse na transmisión da nosa lingua escollendo cinco historias cheas de imaxinación e vaolores positivos coas que compartimos unha hora de diversión.

 

Amelia quere un can ensina como a intelixencia dunha cativa consegue convencer aos maiores para que se cumpra o seu maior desexo.

  

Cando Martiño tivo ganas de mexar na noite de Reis levou un bo susto e pensou que só ía ter carbóns. Neste conto descubrimos o sentido do humor dos Reis Magos que converteron o último vagón do tren que quería Martiño nun penico.

 

 

A Princesa Sabela aprendeunos que é moito máis divertido e estimulante traballar e esforzarse por unha mesma porque descobres cousas novas e podes vivir moitas aventuras. Ser princesa e deixar que outros fagan todo por ti é aburrido, aburrido, aburrido...

 

Con O Papón aprendemos que para convencer a alguén de que deixe de facer algo que non nos gusta, comerse xente neste caso, funciona, moito mellor que a forza bruta, o cariño e deixalo formar parte do noso grupo de amigos.

  

Os tres bandidos decatáronse de que nada nos fai tan felices como gastar o diñeiro e as riquezas que gardamos na felicidade dos demais.

 

NATUREZA EN FOTOS E VERSOS

Que mellor que os versos de Manuel María para acompañar as fermosas fotografías que a comunidade educativa presentou a unha nova edición do Concurso de Fotografía da Natureza, convocado polo departamento de Bioloxía?

CORRELINGUA 2016

Non quería a chuvia que os centros do Morrazo celebrásemos este ano a Festa da Lingua. Mais non nos demos por vencido e desfiamos as negras nubes da mañá e acabamos gozando do sol. O alumnado de dinamización de 1º e 2º da ESO dirixiu e animou os xogos dos máis pequenos e o resto acompañamos a marcha polas rúas de Cangas detrás da pancarta “O galego está en nós”. Logo veu a lectura do manifesto na que participaron Tomás e Rubén e a actuación de GramolaGominola. Pechamos o acto cantando os poemas “O cuco” e “Galiza” de Manuel María. Unha gran festa.  Parabéns a cantos axudastes a organizala e a todos os coles e institutos participantes.

                                                                                                                                                                                       

ROTEIRO LITERARIO POR CELANOVA

Na Casa dos poetas, o alumnado de 2º da ESO puidemos achegarnos á experiencia vital de CURROS ENRÍQUEZ, percorrendo a casa na que viviu de neno ata que os problemas co seu pai fixeron que marchase e se instalase en Madrid. Soubemos dos poemas cos que gañou un concurso poético en Ourense: "O gaiteiro de Penalta", "Unha voda en Einibó" e "A Virxe do Cristal" e observamos nunha maqueta onde están estes lugares, moi próximos a Celanova. A Casa, convertida en museo, garda obxectos persoais como os seus anteollos e textos manuscritos que o seu pai, que era escribán, lle facia copiar. Tamén está súa obra: Aires da miña terra e O Divino sainete, que lle trouxeron tantos problemas coa igrexa, cuxa opulencia criticaba. Curros marchou vivir para a Habana. Foi un poeta pobre pero moi querido polo pobo. Vimos a coroa de loureiro e carballo da súa homenaxe na Coruña e tamén as fotos do seu multitudinario enterro e a primeira bandeira de Galiza que envolveu o seu féretro na viaxe da Habana a Galiza. 

Percorremos tamén o Mosteiro de Celanova, o seu claustro, onde comemos, refuxiándonos da calor exterior, a súa igrexa, o pequeno tesouro da capela mozárabe de San Miguel e  tambén a biblioteca do instituo de Celanova, situado no propio mosteiro. Na praza, despois de comer, lemos algúns poemas representativos da obra de Curros como A Igrexa fría.

Tamén era de Celanova, o poeta CELSO EMILIO FERREIRO e visitamos no mosterio o Arquivo, un lugar de difícil acceso porque os monxe medievais gardaban alí os libros que copiaban a man, o seu maior tesouro. Foi tamén onde encerraron a Celso Emilio, denunciado por uns veciños por criticar o réxime franquista. Alí escribiu o primeiro poema do seu libro máis emblemático, Longa noite de pedra, que Uxía leu para nós. Os seus versos describen moi ben como o ambiente desta habitación toda de pedra e á que só se pode acceder por un estreito balcón se identifica cos sentimentos do poeta que teme pola súa vida despois de traizón sufrida.

O teito é de pedra.
De pedra son os muros
i as tebras.
De pedra o chan
i as reixas.
As portas,
as cadeas,
o aire,
as fenetras
o chan
i as reixas.
As portas,
as cadeas,
o aire,
as olladas,
son de pedra.
Os corazóns dos homes
que ao lonxe espreitan,
feitos están tamén
de pedra.
I eu, morrendo
nesta longa noite
de pedra.

O percorrido rematou na biblioteca, onde lemos outros poemas de Celso Emilio