COS GUÍAS DA ILLA DOS RATOS

Hoxe o alumnado de 2º ESO paseamos pola nosa costa xunto con dous monitores-guía da Asociación “A illa dos Ratos”. Xabi e Óscar leváronnos primeiro á Praia de Rodeira para falarnos da pesca tradicional en Galicia e das melloras que achegaron os fomentadores cataláns: Massó e as súas innovacións (gardería, servizos sociais….), así como outras conserveiras locais serviron de introdución. Tras coñecer o límite entre Cangas e Coiro descubrimos que o antigo Hospital da vila era un sitio onde daban de comer ós pobres. Na Alameda Vella aprendemos o motivo da Estación Meteorolóxica, quen é o Filántropo (non licántropo) de Cangas que tanto ben fixo ó pobo, dando moito diñeiro, por exemplo, para a construción da Praza do mercado. Observamos o nome das rúas vellas;  na igrexa  faláronnos das invasións dos turcos e do “Cristo que non quixo arder”. Finalmente, tras unha parada diante da escola do “Barbicas”, achegámonos  a algunhas casas tradicionais de mariñeiros, as de patín, ou aquelas nas que tiña que entrar o remo das gamelas. Rematamos, todos xuntos, na estatua de María Soliño/a, escoitando a súa vida e tamén as historias das invasións dos piratas e das resistencias dos cangueses… seica o máis entretido de todo o percorrido.

Pareceume unha actividade moi divertida xa que todo se expresaba con bromas e diversión. Sorprendeume bastante xa que vimos moitos sitios curiosos e monumentos ós que non lle damos importancia ningunha, aprendendo moitas cousas da vila na que vivo que non sabía. Estivo ben que fosen contando anécdotas no medio das explicacións.O tempo pasou moi rápido. Gustaríanos repetir a experiencia con outros lugares de Cangas.