CONTRA A VIOLENCIA DE XÉNERO, TI TES A CHAVE

Hoxe, 25 de novembro, todo o instituto saíu a rúa para esixir a fin da violencia machista. Cada un de nós escribiu nunha cartolina por unha cara unha reflexión contra a violencia machista e pola outra o nome dunha das mulleres asasinadas este ano. Logo unimos todos os elos de cartolina formando unha cadea en cada aula á que puxemos un cadeado cunha chave colgada. Cada aula levou a súa cadea, con cadeado e chave en manifestación ata a Praza das Pontes e alí unimos as nosas cadeas mentres se daba lectura a un manifesto que expresaba a nosa condena á calquera tipo de violencia como expresión de amor e o noso compromiso de manter a mirada atenta e non ser vítima nin cómplice da violencia de xénero. Ao colocamos cadeas, cadeados e as chaves e tamén carteis co lema da campaña no enreixado exterior do instituto para transmitir a todo o poba a nosa mensaxe.

VIOLENCIA XENERO VIMEO from lingualiza2 galego on Vimeo.

NAS RELACIÓNS DE PARELLA, TI TES A CHAVE

Achégase o 25 de novembro e nas clases estamos a debater sobre a relación entre os mitos do amor romántico e as relacións tóxicas. Os mitos máis coñecidos puxéronse polos corredores e invitouse a debater sobre eles nas aulas. Como unha das imaxes máis de moda sobre o amor de parella son os cadeados nas pontes e tirar coa chave ao río, escollemos como lema da nosa campaña Contra a violencia de xénero: Ti tes a chave. Podemos escoller encadearnos a outro/a e xurarlle amor eterno se nos sentimos moi románticos pero sempre, sempre, sempre temos que gardar nós a chave para poder ser quen de poñer fin a calquera  relación tóxica que nos faga dano física ou psicoloxicamente. Tras a reflexión nas aulas, explicamos polos corredores o perigo que agocha cada un dos mitos do amor romántico.

mitos amor vimeo from lingualiza on Vimeo.

O GALEGO CHAVE PARA ENTENDER O PORTUGUÉS

O venres pasado fomos ao Porto para comprobar dun xeito práctico como nos entendemos cos portugueses falando en galego. Estivemos primeiro en Sandeman, unha cave de viño de Porto en Vilanova de Gaia. Aquí fixemos as primeiras fotos xunto aos rabelos que se empregaban para transportar o viño polo río e que hoxe pasean aos turistas, coas casas de cores da cidade do Porto de fondo, ao outra beira. Estivo moi ben que o guía nos falase en portugués. Fíxoo de vagar e aclarou todas as nosas dúbidas polo que non houbo problema ningún. Contounos como se fai este viño e ensinounos a cave. Un pequeno vídeo, tamén en portugués, completou a súa información. 

Logo tivemos tempo para percorrer o casco histórico do Porto e procurar onde comer. Tiñamos que preguntarlle á xente da rúa e comprobar se podiamos comunicarnos con fluidez falando nós galego e eles portugués. E non foi difícil, a verdade. Tamén é certo que pouco a pouco fomos afacendo o oído. Cun pouco de boa vontade, non hai ningún problema para entendérmonos.

A visita rematou no Museo Serralves, primeiro na Casa Rosa, na interesante exposición de Miró, explicada tamén pola guía en portugués e logo no propio museo onde había unhas intervencións artísticas superorixinais e creativas. Aprendemos moito e pasámolo estupendo. Volveremos!

TEMPO DE MAGOSTO, CHAVE DE TRADICIÓNS

Vaia festa montamos no MAGOSTO. Pouco importou que chovese algo e que tivésemos que estar baixo tellado. As ganas de cantar e de bailar este ano foron imparables. Tanto que o tempo acabou por animarse e xa puidemos bailar polo patio adiante. Moitas grazas as grandes animadoras de Tromentelo coas súas gaitas e pandeiretas e tamén as clases de baile da nova profe Bea. As cantigas e o baile tradicional son, sen dúbida, a mellor chave para sentir moi dentro o orgullo de formar parte dun pobo creativo e festeiro que soubo sempre compartir e gozar en comunidade.

magosto vimeo from lingualiza on Vimeo.

 

A MÚSICA GALEGA PONSE DE GALA

Non deixedes de asistir no Auditorio de Cangas a gran gala para celebrar os 25 anos da Banda de gaitas Tromentelo este próximo sábado ás 8.  Vémonos alí!

CONVERSANDO EN GALEGO SOBRE ONDAS

O alumnado de Bacharelato celebramos o Día da Ciencia en galego recibindo ao físico José Benito Vázquez  Dorrío, membro do Grupo de Innovación Docente da Universidade de Vigo (GID1), que nos achegou dunha maneira moi práctica e visual a un dos temas de Física máis interesantes: as ondas. 

CIENCIA E TECNOLOXÍA, CHAVE DO FUTURO DO GALEGO

Celebramos o Día da Ciencia en galego cunha clase de matemáticas moi especial en todos os cursos da ESO. Cunha presentación feita en galego, o profesorado explicounos como facer unha estrela de papiroflexia na que ao rematar apareceu unha chave pintada co lema do día: Ciencia e tecnoloxía en galego, chave do futuro. Gardamos todas as estrelas e faremos con elas unha grande árbore para decorar o instituto cando chegue o Nadal.

CONVERSANDO CON CELSO PARADA

Hoxe celebrouse a primeira sesión do club de lectura Vaidelibros, aberto a toda a comunidade educativa. O libro escollido no remate do Ano Castelao foi Os vellos non deben de namorarse,

aproveitando que Teatro do Morcego a está a representar en Cangas. Contamos coa presenza de Celso Parada, que é o director e tamén actor nesta montaxe, representando un dos tres vellos da historia. actor e director de teatro, cine e televisión. Foi moi interesante poder falar con el dunha obra que acababamos de ver representada. Contounos ademais moitas anécdotas do seu traballo como actor na TVG e das diferenzas entre o teatro e o cine e a televisión.

OS VELLOS NON DEBEN DE NAMORARSE

Hoxe, o alumnado de 4º ESO e de 1º e 2º de Bacharelato tivemos a ocasión de celebrar o Ano Castelao gozando dun clásicos do teatro galego: Os vellos non deben de namorarse, no Auditorio de Cangas. Esta é unha farsa que trata dos amores de tres vellos imprudentes, D. Saturio, D. Ramón e o señor Fuco, que teñen a desgracia de poñer os seus ollos na mocedade garrida de tres rapazas novas: Lela, Micaela e Pimpinela. Como consecuencia desa imprudencia, os tres rematan morrendo. D. Saturio, envelenado cun solimán da propia botica. D. Ramón, que por un bico entrega a alma deitado no esterco; e o vinculeiro señor Fuco, que remata por casar coa namorada e morrendo de felicidade. A representación de Teatro do Morcego  non defraudou a ninguén. 

Teremos ademais a oportunidade de conversar con Celso Parada, director e actor participante na montaxe, na nova sesión do club de lectura Vaidelibros. estades todos e todas invitadas.

CELEBRANDO O ANO CASTELAO EN PONTEVEDRA

No 2016 é o Ano Castelao no que se conmemora  o centenario da súa chegada á cidade de Pontevedra, o 75 aniversario da estrea de Os vellos non deben de namorarse, e o Día das Artes Galegas, que este ano se dedica a este autor.  E para celebralo o alumnado de 1º da ESO percorreu a ruta Castelao por Pontevedra, visitando no Museo, en cuxa fundación participou o propio Castelao, dúas grandes exposicións conmemorativas do Ano Castelao: "Castelao artista. Os fundamentos do seu estilo. 1905-1920" e "Meu Pontevedra". 

ENTRAMOS NO SAMAÍN COA CHAVE DAS NOVELAS DE AGUSTÍN FERNÁNDEZ PAZ

Escenarios e fragmentos das novelas de terror de Agustín Fernández Paz enchen xa a planta baixa do instituto na celebración do Samaín. Hoxe un grupo de alumnos e alumnas de 3º fixemos de guías para o alumado de 1º da ESO relacionando o argumento das novelas cos escenarios recreados. Ata fixemos pequenas dramatizacións! Foi unha experiencia moi interesante. Podedes ver algúns anacos nestes vídeos e fotos:

Corredores de sombras con Ánxela, Ían e Candela  

 
corredores de sombra vimeo from lingualiza on Vimeo.

Cartas de inverno con Antón e Paula.



Aire negro con Valeria e Néstor



Tres pasos polo misterio con Candela e Valeria



Herdanza de sangue, un relato de A neve interminable con Néstor, Isaac e Tamara


 
A porta do alén, un relato de As fronteiras do medo con Isaac



Noite de voraces sombras

Fantasmas no corredor